Geguritan Cupak Grantang

Ring sor puniki wantah transkrip geguritan Cupak lan Grantang sane pipil saking kaset. Rarisang download ring link puniki mp3

PUPUH DURMA

1.   Ada satwa ujang tityang ring sesame, pecak saking Majapahit, wong menyama sareng ruwa, pada lanang sareng ruwa, I Gde Cupak aran pertami, Ne alitan, I Made Grantang mapepasih

2.   Rupa bagus basa drana alep pisan, kemikane nyunyur manis, asing anaak mangatonang, lanang wadon sami suka, Nanging sane pinih kelih, Ya I cupak, rupa bocok idepne culig.

3.   Pangucapne lintang sumbung tuwi pisuna, twara ngelah olas asih, tan mamineh raga bocok, cangkem linggah roma barak, kumis jempang basang endig, kereng medahar, akeplukan tan mindoin

4.   Kocap maangkin ya I cupak lan adinya, dina enjing ya kecarik, natad sampi ayat matekap, sampun naring carik prapta, sampin nyane kaugain, wus masangan, I Grantang raris ya ngelampit

5.   Nging I cupak adinyane tan kalinguang, apisan idepne melali, carat-curut tan padonan, ngantos liwat pukul sia, I Cupak ninggal adi melali, Made Grantang, raris usan ya ngelampit

PUPUH SINOM

1.   Kancit rawuh I Gde Cupak, sada gisu nyagjag i adi, angucap ring adinya, pangucapne makuma asih, Made Grantang adin beli, depang lampit beli nikul, Made grantang alon nimbal, rihinan sampun budal beli, tityang mandus, beline nual ling ne getar

2.   Pade keta rawos I dewa, rihinan sampun kolo mulih, basang kolo seduk pisan, tuara sida baan nampanin, kema sampun adius adi, wus angucap ya lumaku, sambil natad ubunya, tolah-tolih ya memargi, ring tengah enut, I Cupak raris maguyangan

3.   Keta baan ngadu daya, ngawe rupa apang weci, mangda pangus wus matekap, manyilibang idep ne lengit, risampune lintang menyi, raris ditu ngundag laku, mapi- mapi kalesonan, jlempah jlempoh ya memargi, sampuniku, solah ipun I Gde Cupak.

4.   Sampun napak diwang umah, gelar-gelur ipun nangis, reramanya katanggama, mireng i cupak rawuh nangis, raris gisu menyagjagin, tur masesed ring i sunu, nguda cening nangis prapta, tur monotan ragan cening, kalih ipun, adin cening I Made dija

5.   Sigsigan I cupak nimbal, lacur kolo ne tan kadi, ngelah adi made grantang, lengit tuara nyak ngelampit, kolo dogen matekap tuni, ngantos lesu kolo langkung, yadi grantang ipun ngilang, carat curut tanpa indik, sareng nak luh, wangsitin kolo ipun galak.

6.   Wau mandeg ling I cupak, bapan ipun jeg berangti, raris ngajum i gde cupak, pengajume alus manis, kema cening mandus dumun, wusan jua maselselan, bapa nyantos i made prapti, pade rawuh, i made praya tig-tig bapa.

7.   Lila hidep I Gde Cupak, mireng atur bapa brangti, sadurunge i made prapta, i cupak raris ya melali, ngaba ayam bulu buik, kabongbong ring kantin ipun, saksat anggon pasiliban, pang tan ngenah idepne culig, sampuniku, i cupak baan ngeka daya

PUPUH GINADA

1.   Made Grantang ne kocapang, ngemantukang saking carik, pemargine alon pisan, antuk lesu ne kalakung, wong dahane liu nyapa, maring margi, Made Grantang kenyung nual.

2.   Sampun rauh maring umah, bapanyane menyagjagin, jeg sehasa nyambak pianak, tur manigtig miwah nanjung, i made grantang ya kebatbat, mintar cai, nirdon bapa nerehang iba.

3.   Noro midep pesan bapa, solah cai asapuniki, rupan iba dogen melah, idep solah cai ne letuh, nguluk-nguluk i rerama, mobab tuwi, ngado-ngadoang payuk jakan.

4.   Dijo molih ajaran keta, mula ne keta tulad cai, nirdon pisan tuyuh bapa, ngemit cai uling malu, suban jani mase wirat, idep cai, saksat kadi asu singal

PUPUH SEMARANDANA

1.   I Made osek ya mirage, nguntul nangis ya sig-sigan, raris matur ring bapane, ampura bapa sisip tityang, manut kadi ling i bapa, nundung dewek tityang wawu, tityang nyadya ngemargiang.

2.   Sadurunge tityange mepamit, aksi sembah tityang bapa, mogi-mogi petilar tityange, urip i bapa bagia jumah, muah belin tityang i cupak, apang tuara nemu kengguh, pamit sampun tityang bapa

3.   Made Grantang ya memargi, nyelsel raga maring lampah, maminehin sisip ragane, anging tuara kacundukang, sampun naring tengah lampah, lemet manah i made ditu, antuk tuara keniamerta.

4.   Ngelawanin ya memargi, idep ne asah ngutang raga, olih dahat nandang sakite, sakit manah sakit angga, sampun doh ya lumampah, i cupak mara rauh ipun, tur atanya ring bapanya.

5.   Naweg bapa miwah bibi, adin tityang i made dija, masawur aris bapan ipune, i adi sampun tigtig bapa, kalih sampun tundung tunian, mara keto bapan ne nutur, i cupak nangis maseselan.

6.   Raris matur I Cupak nangis, nguda ketoang adin kola, apa sisip adin kolo, krana nundung i made bapa, dija jani alih i granting, bes klajok bapa ngopat ipun, nundung i adi tanpa salah

PUPUH DURMA

1.   Reramanye kejut mireng ling I Cupak, nartayang adi tanpa sisip, engsek manahne kalintang, rasa tuara sida ngucap, eling kaping raga sisip, ngopak pianak, gangsar tindak tuna budi.

2.   Tur ngangsehang matur sisip ring I Cupak, ampura sisip bapa cening, klajok bapa nigtig pianak, matbat nundung adin dewa, gde cupak ya nyawurin, jani kola, praya luas ngalih i adi.

3.   Nah karyanan jani kola bekel luas, apang gelis ne memargi, gisu memene ngaryanang, akeplukan ka katakilan, sampun puput ne cumawis, gede cupak, raris mangkat ngalih i adi.

4.   Gelar gelur I Cupak ring pemarga, i made grantang kajeritin, sami jejeh wong ngatonang, narka gamang ne memarga, mendah pada wong nyimpedin, ada narka, gering memargi jerat-jerit.

5.   Ngantos lesu Gede Cupak ya lumampah, ngesengin i made jerat-jerit, i made durung kacundukang, gelis lampah ne carita, napak maring wana giri, ngalih adinya, sarwa buron takut sami

6.   Ya i kidang melaib ngaton I Cupak, sarwa kedis umung mamunyi, muah i bojog ya pakruak, saling wangsit ring ruangnya, ngaton anak baneh memargi, nyusup alas, rupanyane lintang pingit

PUPUH GINANTI

1.   Sampun tlengin alas rawuh, i made wawu ne kepanggih, raris matur ring adinya, pengucape ngasih asih, adin beli bagus idewa, ampura sisip beline adi.

2.   Margi sampun adi mantuk, made grantang nanggal aris, kema beli dogen budal, cutet tityang tan mewali, ape keman tityang budal, i rerama sampun tan ngemit.

3.   Malih tityang sampun katundung, banggiang sampun tityang pamit, yastun tityang ngemasin pejah, sampun puput tityang ngitungin, mangkin beli apang wikan, kapin idep tityange yukti.

4.   Boya tityang midep ngambul, ring rerama midep bakti, manut kadi warah agama, tan wenang piwal yayah bibi, nika anggen tityang dasar, krana tityang ninggal beli

PUPUH MASKUMAMBANG

1.   Tur sumahur Gde Cupak ling ne sedih, adi made granting, pada yadi tuara mulih, kolo numut idep i dewa.

2.   Pang sepalan kolo murip lawan adi, nikul suka duka, margi murud dumun adi, bayun kolo lesu pisan.

3.   Malih kolo kadung ngaba bekel akedik, margi sampun gah-gah, sareng rua nahar adi, made grantang manuwutang.

4.   Jeg macepol Gde Cupak ya malinggih, antuk seduk pisan, i made raris kapekonin, ka luwahe ngalih toya

5.   Made Grantang tuara tulak tur memargi, katukade ngalih toya, sampun doh ya memargi, i gde cupak ngeka daya.

PUPUH PANGKUR

1.   Raris ipun megah-gahan, sada gisu ngesop nasi, tolah-tolih, ngawas pade adine rawuh, takilane katelasang, sampun telas, kulitnyane kaura ditu, usan ngura takilanye, mapi aturu geras-geris.

2.   Tuara lami kacerita, made grantang kocap mangkin ya prapti, dapet beline aturu, takilane mebrarakan, dagingne telas, i cupak raris ya kadundun, nuli enten makwewangan, mapi-mapi twara uning.

3.   Raris matur ring adinya, nguda mure bekele adi, benyah latig, sinah sampun bes-bes asu, bes lami adi ngalih toya, ngantos bekel bakat tinggal beli aturu, kadong kari ne sisanya, margi dahar bareng adi.

4.   Mesawur ipun I Grantang, durus sampun dahar beli ne padid, tityang tuara merasa seduk, i gde cupak idepe egar, ban rumasa mapikolih dayane letuh, tur medahar malih i cupak, nahar sisan ipun padidi.

5.   Ngiwa tengen ya masopan, wusan ipun nahar nasi, metaeg cicih, adinyane tan ngarungu, nuli ipun ngundag lampah, nyusup alas, belinyane lesu numut, busan-busan nagih budal, anging i made tuara ngiring

PUPUH SINOM

1.   Akudang desa sampun liwat, lampah ipun sang kekalih, kocap rawuh ring bancingah, diwang puri di Kediri, bencingahe samun tuwi , noro ade wong lumaku, asu dogen ngulun ngongkong, i cupak ngetor nyesed adi, adi bagus, nguda jagad dini sunia.

2.   Rasa jejeh manah kola, ngelampahin jagat niki, yan tan iwang kolo narka, nawi jagat keni gering, made grantang menyawurin, mendep beli da papak itung, kocap rawuh maring pasar, taler ditu dahat sepi, tuah aukud, ada dagang nasi katon.

3.   Sada nyilib ya madolan , tur merika sang kekalih, mapitakon ring idagang, i cupak ipun ngawitin, ih... dagang kolo metari, nguda gumi dini suwung, orahin ja malu kola, apang kolo nawang jani, adin ipun, raris nyelag ling i cupak.

4.   Naweg tityang jero dagang, ampura atur tityange rihin, kalih atur belin tityang, ampura pisan kadi mangkin, atur tityang kaping kalih, ring jerone atanya matur, jagat niki napi wastanya, napi dados samun tuwi, lintang suwung, tuara ada wong memasar.

5.   Yan tan iwang tityang nyiksa, buat sasuduk jagat niki, dagang nasi menyawurin, inggih jero sang prapti, jagat kediri niki mungguh, awinanya lintang sunia, keni ala jagat niki, i menaru, memandung putrin sang nata

PUPUH GINADA

1.   Keta jero kawitanya, sangkan jagat dini sepi, mungguing ida sri narendra, sedek bingung di puri agung, mangitungin putrin ida, ne kemanin, pandung menaru di purian.

2.   I Menaru sakti pisan, tabeng ida kasor sami, rawuh pare rencang ida, tan purun medal lanang wadu, mangkin hana naling ida, ngedawuhin, para rencang ne samian.

3.   Sira purun ngelampusang, menaru iku sane mangkin, manut naling ida sang nata, ring kediri ka adeg agung, maka miwah sunun ida, ring sang molih, kal temuang di puri nata.

4.   Gde Cupak elah nanggal, raja belog kasorang maling, menaru aukud mengasorang, kola biasa nampah menaru, kema orahang jani kola, ne metindih, teken ida sang narendra

PUPUH GINANTI

1.   Kaling menaru tuah aukud, dangan kolo mangitungin, i grantang megat ling i cupak, da beli langkung mamunyi, awak muda da makuma, diparan anak pineh beli.

2.   Meplawanan i cupak bengkung, bas singgih adi mamunyi, adi mula getap pisan, tuara nyuang bayun beli, eda kaling maupah jagat, baan nasi dogen kendel beli.

3.   Lan pademang i menaru, apang taen ngisi gumi, sampunika ling i cupak, made grantang nual malih, pade keta beli cupak, tityang ngiring atur beli

PUPUH MASKUMAMBANG

1.   Tur matur I Made naring idagang nasi, inggih sang madolan, rawuhang atur tityang niki, kapin ida sri narendra

2.   Pade keta buat unduk jagat dini, tityang sareng ruwa, nyadia ngaturang ayah ka puri, sanggup nyabut jiwan i dusta.

3.   I dagang nasi nuli gisu pedek ka puri, tangkil ri sang nata, sampun napak ya di puri, raris matur ri sang nata.

4.   Naweg ratu, nunas ampura tityang mangkin, nanging ampurayang, kadi presangga tityang prapti, bahan hana aturang tityang

PUPUH DURMA

1.   Sang prabu raris nual manohara, nyesed atur sang menangkil, ne ke cai rencang nira, ring nira ayat misuguh apa, durus sampun aturang jani, kapin nira, isang tangkil ngaturang aris.

2.   Puniki hana tamiu prapta sareng ruwa, ngaturang ayah sadia ka puri, ipun sanggup ngemademang, ne mandung sunun cokor idewa, i menaru minakadi, tur angucap, ida sang nata ri sang tangkil.

3.   Pade keta atur idewa kapin nira, ndikain sampun ya kapuri, sang menangkil nora tulak, matur pamit tur memarga, gelis lampah ne kewarni, i jero dagang, ring genahnya ngadol nasi.

4.   Kacundukan ya I Cupak, ngumbah tangan, jenggot kumis menasi-nasi, i made kimud ngaton i cupak, lano ngaba basang layah, i grantang raris matur sisip, jero dagang, ampura sisip i cupak mangkin

PUPUH SINOM

1.   Sane pisaratang tityang, sisip belin tityang mangkin, tanpa tari kapin tityang, ngambil nasin jero akedik, ledang ngampurayang jani, tityang noro muat panuku, mesawur i cupak sada lagas, yukti, kolo ngambil nasi, ampura dumun, basang kolo seduk pisan.

2.   Kangen idep ijero dagang, mireng atur i grantang aris, atur i cupak tan kalinguang, matur raris idagang nasi, nguningang ling sri bupati, marep kading i jero tamiu, jero tamiu naweg pisan, mangkin kandikayang tangkil, ka puri agung, antuk linggih ida sang nata.

3.   Made Grantang lan I Cupak, matur pamit tur memargi, wawu maring puri napak, rencang puri melaibin, salit tarka sareng sami, pada ngaden pandung rawuh, tur mewangsit cupak ngerak, nguda melaib sareng sami, oja takut, iki kolo i cupak teka.

4.   Sadian kolone midep teka, ayat matindih kapuri, olih kolo mireng gatra, katiben ala puri dini, enta krana kolo mai, nyadia mancut jiwan menaru, rencang puri sami bengong, mireng basan tamiu prapti, purusa langkung, nyentokang sakti nigtig wijang.

5.   Mewangsit nyingid i granting, kapin belin ne mamunyi, eda klajok beli ngucap, agungan sanggup noro dadi, sang prabu angucap aris, kapin isang mawak tamiu, ne ke cai sareng ruwa, saking dija pecake yukti, kalih pungkus,  sira pada aran idewa

PUPUH GINADA

1.   Made Grantang alon nanggal, naring ida sri bupati, ampura ratu atur tityang, tityang panjak ring maja langu, made grantang aran tityang, muah niki, belin tityang madan i cupak.

2.   Malih tityang jadma nista, ring iratu nyadia tangkil, maka sadyan manah tityang, sareng kalih medek iratu, tityang praya ngaturang ayah, kadi mangkin, kapin anggan cokor idewa

3.   Antuk tityang mireng gatra, i ratu kocap bencana mangkin, i raden dewi sunun ida, kocap pandung i menaru, nika keranan tityang prapta, sareng kalih, ayat mela cokor idewa

4.   Mogi sida antuk tityang, nyabut jiwan i raksasi, cupak saget nimbal ngucap, kola tuara bisa matur, anging yuktin idep kola, patuh tuwi, kapin i made adin kola

5.   Nanging sadurung kola luas, ada buat kolo jani, icen kola ngidih ajengan, wireh basang kola seduk, sakit idep i granting, mamiragi, atur i cupak sampunika

6.   Nanging ipun tanpa ngucap, antuk kimud ne tan kadi, sang prabu nuli ngandika, buat ajengan da kengguh, durung mandeg naling ida, saget prapti, panyeroan marerodan

7.   Sami pada masuhunan, nyuwun dulang misa nasi, ada makta lawar barak, muah guling bebangkit aukud, ngetel paos cupak nyingak, punjung nasi, mebe guling empuk nyegagag

8.   Sang kalih raris nunas, pican ida sri bupati, i grantang ya namping dulang, nglungsur pican anake agung, kadi ipun i gde cupak, durung becik, tegak ipun nengel lawar

9.   Ngiwa tengan limane ngarang, ngesop nasi ngebes guling, sepan-sepan ya medahar, telas lisig guling aukud, jukut lawar tanpa sisa, muah nasi, katelahang ne adulang.

10. Mecape-cape ya i cupak, jenggot kumis menasi-nasi, made grantang kimud nyingak, i cupak tuara ngelah kimud, sampun wusan ya medahar, sareng kalih, minta pamit ri sang nata.

PUPUH MASKUMAMBANG

1.   Mawecana Sri Narendra ri sang kalih, sadurunge mangkat, hana paican nira malih, ring idewa sareng ruwa

2.   Niki hana bungkung emas utaman sari, socanyane mirah, muah keris pecak puri, aturang nira ring idewa

3.   Sat-sat ciri idewa dados utusan puri, kawotang juwa makta, kayang katon raden dewi, paica niki biaktayang

4.   Made Grantang matur suksma tur mepamit, nuli ya lumampah, gelis lampah sang kekalih, ring tengah alas wayah prapta.

5.   Sampun napak, ring genah Menaru ne memargi, i cupak bedak layah, numut adine memargi, saget ada katon telaga

6.   Malih linggah toyanyane mesawang kuning, enyud kayun i cupak, nuli nyambat ring i adi, buat bedak ipune lintang

PUPUH DURMA

1.   Made Grantang sanga bagus adin kola, jalan mereren jahan adi, krongkong kolo bedak pisan, sedang melah katon telaga, kola praya kema jani, nginem toya, adinyane tan ngicenin.

2.   Beli Gde tan wenang ditu ngalih toya, enta enceh menaru beli, makesyab takut bayun i cupak, mare ningeh ling i granting, lintang tuna muane putih, batis ngetor, premangkin nagih mulih

3.   Made Grantang raris ngucap ring belinya, Ling ne manis memanesin, nirdon beli nutug tityang, tan satya beli ring wecana, sareng tityang numpang margi, hidup pejah, tan apan-apan nagih mulih

4.   Pang tan tityang maksa beli, tan purusa, becik sampun beli mulih, kadung sakit sanggup tityang, napi puarane matulak, i made grantang lawut memargi, i gde cupak, saget nutug ngundag margi

5.   Durung punapi matindakan sang ka ruwa, i cupak ngaton gumuk maririg, raris metakon ring adinya, adin kolo made granting, nyen ngae gunung-gunungan dini, i made nual, tain menaru niki beli

6.   Mara keta I Cupak mireng atur adinya, jeg nyelempoh i cupak ngeling, yan amone geden tainya, mongken geden menarunya, jalan sampun matulak adi, yan tan enyak, tuara urung kolo mati

7.   Malih ditu Made Grantang matbat belinya, nista beli ngutang munyi, sanggup beli gede pisan, kapin linggih sri narendra, becik sik-sik malu beli, atur tityang, pang tan beli salit arti.

8.   Patingetang duk medahar di puri nata, nengel lawar mesbes guling, mamunyi kalintang sumbar, i cupak gobane kuning, nyelempoh negak, matah-matah peluhne mijil

9.   Tur katinggal I Gde Cupak ring adinya, i cupak ngrepak manututin, gelis mangkin caritayang, saget umah menaru katon, ring tengah goane ngempi, disisinya, abing ngempung bet tan sipi

PUPUH GINADA

1.   Ngetel toyan aksin I Cupak, antuk takut ne tan sipi, raris matur ring i granting, sambil nangis segu-segu, adi bagus ampura kolo, kadi mangkin, adi antos kolo diwang

2.   Anging ada idih kolo, sadurunge adi ninggal, turun ka goan i menaru, tegul malu dewek kola, deriki adi, ring wit asem ne kawotang

3.   Made Grantang tuara tulak, raris bincuh ngalih tali, anggon negul gde cupak, i cupak raris kategul, sampun kawot ibedanya, tur mamunyi, i made minget i cupak

4.   Duh beli Gede Cupak, pehawas idep beli dini, sedurung tityang masesentok, ne tumbak cirin magebug, risampune tityang mayuda, tumbak niki, cirin tityang kalah menang

5.   Pade kelod tumbake pungkat, cirin tityang mati beli, yan bah kangin tumbak tityang, maka cirin tityang unggul, keta beli wangsit tityang, sane mangkin, beli gde tinggal tityang

GINADA BASUR

1.     Raris turun Made Grantang, nuluh ebun ya memargi, rawuh maring tengah gowa, saget katon i menaru, sedek nagih marikosa, raden dewi, i made nuli matengeran

2.   I Menaru katanggama, tur angucap sada nuding, ih... manusa cuil iba, wanen iba mai rawuh, nyalah kai nadah iba, wong cilik, acaplokan nu kuangan

3.   Yaning midep idup iba, matulak iba ane jani, i made grantang ngawirangan, apa petan iba menaru, nyaplok manusa cuil nyalah, sumbung tuwi, kading kai petan iba.

4.   Yaning iba tuara nawang, kai grantang teka mai, nyadya nyabut urip iba, mendak sunun anak agung, yan dot murip idep iba, raden dewi, aturang kapin i granting.

5.   Mara keta I Made matbat, i menaru ngelur brangti, lawut nyaup i granting, pascat nangkis made ditu, sambil ditu ngalih selah, tur ngecogin, nikem menaru basangnya.

6.   Ngelur Menaru kesakitan, gelurane ngebek gumi, i cupak mireng beduwuran, magejeran kadi linuh, cupak takut manyelungsat, jerat-jerit, pakecrat-crit encehne medal

7.   Kancit pegat ibedanya, i cupak ulung mangeraik, raris bangun grayah-grayah, eling kapin tumbak ditu, di marane kewaspada, saget panggih, pungkat kangin tumbaknya

PUPUH SINOM

1.   Masriyeng ilang takut i cupak, ngaton tumbak pungkat kangin, pesu munyin nyane getar, mrasa kapin adine molih, adi grantang antos beli, kola nglawan i menaru, yan tan kolomaan masiat, sakit idep kolo adi, i menaru, jani lakar cahcah kola.

2.   Nuli tuwun ya i cupak, grepe-grepe nuluh tali, sampun rawuh ya betenan, dapet menaru suba mati, bintak i cupak manikemin, ngantos benyah bangken ipun, saget grantang kacundukan, sedek ngemban raden dewi, nuli matur, i gde cupak ring adinya

3.   Adi Grantang adi kola, encen menaru buin adi, lakar tampah-tampah kola, sambil nyerere raden dewi, kasemaran buduh paling, adinyane kajum-ajum, made grantang bagus idewa, kola ngajak raden dewi, adi bagus, lesu busan suwud mayuda.

4.   Adinyane manuwutang, katimbalan i raden dewi, i cupak gisu ya menekan, ngemban ida raden dewi, risampune duwuran prapti, i raden dewi karuudan ditu, nuli i cupak sepan-sepan, ngalih bungas gowane malih, raris ditu, tali bune kapegatang