Geguritan Dharma Prawertti

GEGURITAN

DHARMA PRAWRETTI

Ida Pedanda Putra Kemenuh

I.  NGEREREH PAGURUAN

PUCUNG

1. Cening bagus – Melahang menampi tutur – Pirengang sekenang – Incepang simpen di hati – Pang de labuh – Kasusilan anggen ngemban

2. Yan kapungkur – Kaget cening ngalih guru – Melahang medasang – Waspadayang apang pasti – Pang da lacur – Ngojog guru mondong loba

3. Guru iku – Ne mondong loba satuwuk – Impasin to nanak – Mangden tan labuh nguliling – Ne tan urung – Ngawe sengsaraa kawekas

4. To Sang Guru – Ne ngaba corah satuwuk – Tan doh ring Sang Baka – Ngulah pati saking silib – Jantos purun – Ngemargiang himsa karma

5. Mirib ipun ( Sang Baka ) - Lali ring sang karma nutug - Mangkin caritayang - Sang Yuyu durus mengapit - Nah pamuput - Sang Baka ngemasin pejah

6. Mula tuduh – Hyang Widhi ne mula asung – Mawet karmaphala – Tan dados tulak kelidin – Ngardi hayu – Sinah hayu ya temokang

7. Yan kapulut – Gurune loba kapitut – Tanpa harimbhawa – Sinah ala ne nepenin – Ala hayu – Iku mijil saking karma

8. Sangkan bagus – Gurune dursila iku – Becik ya impasang – Mangden tan ngardi pinakit – Twara patut – Ento anggon paguruan

9. Guru tuhu – Anggen kanti ento ruruh – Nanging ke pang tatas – Wiweka anggen nyelehin – Ento tenung – Anggen nyiksa guru raga

10. Mangden adung – Becik waspadayang malu – Suba ke Sang Gurwa – Tekek ngamong sila yukti – Ento tuhu – Sikut becik ngawe sadya

11. Cening Bagus – Bapa melid mapitutur – Melahang mirengang – Jroning hidup apang uning – Becik malu – Di raga suluh-suluhang

12. Suluh iku – Su ngaran luwih manerus – Luh hayu kang ngaran – Keto cening apang eling – Jroning hidup – Rahayu alih arepang

13. Eda caluh – Nyalanang bikase sigug – Brangti lobangkara – Ento sutsutin di hati – Pang da ngliput – Ngawe saranta di jalan

14. Dharma iku – Agem mangdennya rahayu – Rurung tan paceda – Bersih galang langkung trepti – Ngawe lantur – Muluh ke jagat nirbana

15. Ento tuhu – Tetujon jadmane hidup – Mirib suba tinglas – Madak tan bingung di hati – Jalan tinut – Saking caluh ngalih elah

16. Mirib sampun – Cening jagra uli bangun – Katindih ban galang – Ga kang ingaran margi – Lang puniku – Langit bersih ingaranan

17. Mugi lantur – Cening mamangguh ne ruruh – Nuluh marga galang – Galange di kayun jati – Nah pamuput – Sidha manggih kasentosan

18. Wireh sampun – Banget wengine kelangkung – Ngiring kepunggelang – Lanturang antuk ginanti – Reh san pucung – Suba kiap uab-uab

II.  AHIMSA - DASASILA

GINANTI

1. Sang sisyawan raris matur – Duh Ratu Sang Tapa luwih – Durusang nikain tityang – Ne ketunan sami-sami – Tityang sayaga ngantosang – Sabuh wacanan Sang Resi

2. Sang Guru ngandika halus – Cening Bagus sayang luwih – Sadurung bapane budal – Ke jagate sunya sepi – Kedeh bapa makelingang – Indik kasusilan jati

3. Manut bawos Ida Sang Putus – Dasasila apang pasti – Becik Bapa miterangang – Artinnyane siki-siki – Nanging pedasang mirengang – Apang twara bingung nampi

4. AHIMSA malu kawuwus – Solah tan memati-mati – Sahi mondong kasih sayang – Marep ring sarwa maurip – Patuh sayange ring raga – Ento solah dharma jati

5. Welas asihe puniku – Becik agem apang pasti – Peteng lemah aja lupa – Ngacep I sarwa maurip – Apang manggih kesantosan – Pangan kinum midhuh sami

6. Keto masih satuwuk – Daging rawuh jagat sami – Mangda tan obah lan ginggang – Maweh bukti hasil bumi – Kalih sang mangemong jagat – Mangda jujur ngawe trepti

7. Bangras mageek puniku – Taler ngranjing himsa karmi – Yadyastu marep ring oka – Jangkep ngawe jejeh paling – Kayang kelih mondong getap – Rendah diri ento kagisi

8. Rendah diri artos ipun – Takut rikuh asing kambil – Masa pelih masa liked – Jiwane cenik mangilgil – Keto sang katunan manah – Kejokan ya sami-sami

9. Sajroning tri kaya iku – Di bawos patut apikin – Wireh yan bawose iwang – Bangras menyakitin hati – Muwuh demene misuna – Pateh ken memati-mati

10. Ento krana cening bagus – Mageek bangras impasin – Mekadi da ngawe ala – Marep ring I sarwa prani – Keto cening apang tatas – Himsa karmane kelidin

11. Ring tattwa seken kepangguh – Solahe memati-mati – Makadinnya ring manusa – Banget papane kepanggih – Terunane milu jengah – Purwa karmane ketampi

12. Ngawit jani da mamurug – Solahe memati-mati – Wireh seken ngawe dosa – Sentanane milu sedih – Melah ne jani kawitang – Sila dharmane marginin

13. Wantah solahe ne patut – Ngicalang sekancan gering – Geringe mungguh ring raga – Mekadi memati-mati – Miwah demene misuna – Makejang patut bersihin

14. Sang sisyawan malih matur – Ratu Sang Diksita luwih – Malih tityang manunasang – Indike memati-mati – Ne mekanten jroning yadnya – Akweh kantun kemarginin

15. Sang tapa gelis mawuwus – Kene nanak apang uning – Sajroning himsakarma – Ring silakrama kepanggih – Masih ada pewatesnya – Mangge ring yadnya mekadi

16. Jroning panca yadnya iku – Atiti puja to malih – Keto masih watek ksatrya – Duk ngadu yuda sutindih – Ring Negara miwah wadwa – Masih dharma mengawakin

17. Indike sami punika – Yadyastu memati-mati – Reh kantun jroning dharma – Twara pacang kapasisip – Wireh pengaptine sinah – Tan saking nresangsa budhi

18. Awinan sang ksatrya iku – Kala mayudha tan gingsir – Yaning lampus ring payudan – Wisnu lokane kepangguh – Keto kebawos ring Gita – Pakeling Shri Kresna jati

19. Nanging masih apang tahu – Ngunedika jroning indik – Reh pangked uninge katah – Margine masih tan kidik – Kanggen nyujuh swargaloka – Bina wakya tunggil kapti

20. Indike mepalih liyu – Sangkan ya galih-galihin – Mangdennya tan salah genah – Iwang suduk minekadi – Puput ne patut elingang – Tur resepang jroning hati

21. Nah amonto cening malu – Bapa makeling ring cening – Ne ngenenin himsa karma – Ne jani becik walinin – Dasasilane lanturang – Tur resepang jroning hati

III.  BRAHMACARYA

GINANTI

1. Karwa Brahmacari iku – Tan rungu ring anak istri – Dini nerus kaipian – Tan kadoga sang apekik – Antuk apik ngamongang brata – Tapa lan Samadhi luwih

2. Sang Brahmacari satuwuk – Tekek ngamong silayukti – Sahi tampek ring sang guru – Bhakti manyerahang diri – Apang ida kanggen lingga – Manuncap nirbhana bhumi

3. Sang guru malih mawuwus – Alep banban nekeng hati – Wiwekane tan katinggal – Wiragya kanggen nasarin – Keto gurune utama – Ngejuk murid maengket kalis

4. Papikate bawos halus – Ne doh saking kayun perih – Mebawa mukane galang – Banget nudut sang nyingakin – Brangti lobane manyerah – Ring sang guru lwihing budhi

5. Nanak bagus sang annulus – Malih bapa memanjangin – Sang ngamongang brahmacarya – Teleb ngamong budhi hening – Bersih galang twara samara – Gemet ngemit suklan hati

6. Satuduh Ida Sang Guru – Ketampanin antuk eling – Saha tan lali manyembah – Maka bukti bhakti jati – Tlus twara kawaranan – Jeg caluh narosang hati

7. Sang Brahmacari satuwuk – Motsaha ngawasa diri – Kanti paling I Angkara – Twara maan selah becik – Ngisinin pakitan manah – Ne dot mengasorang jadmi

8. Ento krana cening bagus – Gibrasang da ngekoh hati – Bapa jati banget sayang – Ring sang takut ngardi becik – Nging bani masolah iwang – Ne sinah nyangsara diri

9. Jantos iriki kaputus – Sang masolah Brahmacari – Becik lanturang ne lian – Ginada tuwur ne mangkin – Nanging ke sampunang lupa – Nyuksma ring sang ginanti

IV.  SATYA – DASA YAMA BRATA

GINADA

1. Ne mangkin bapa ngindayang – Artin SATYA ne pang uning – Ento sila kaping tiga – Melahang cening mangrungu – Sang Satya tan nahan bobab – Jujur sahi – Mekadi satya wacana

2. Satya mukianing dharma – Manut bebawos Sang Resi – Jalan ke jani tatasang – Apang twara cening bingung – Ne imba anggon medasang – Mugi cening – Sidha nampi tur resepang

3. Duk Ida Sang Wrekodara – Maguru satya duk nguni – Ring Ida Bhagawan Drona – Wantah satya maka hulu – Hidup mati tan kaetang – Wantah nunggil – Tuduh Guru kemargiang

4. Manut penampin Sang Bima – Suka duka lara pati – Ento jatinnya tan ngoda – Wireh pangugune puput – Teleb maguru susrusa – Satya bhakti – Kanggen ngalih kenirbanan

5. Kaping pat mangkin satwayang – AWYAWAHARA kapuji – Ne marti tan nahan sugat – Ngawe adung ya satuwuk – Citta budhi lan pangrasa – Masih nunggil – Masedana harimbhawa

6. Ne kebawos HARIMBHAWA – Apang cening mugi uning – Becik tampaning resepang – Selehin artinnya malu – Harimbhawa keartiang – Wantah jati – Sang uning nyikutang raga

7. Cingak daging Samuscaya – Kardin Resi Wararuci – Nyatwayang Sang Harimbhawa – Ne satuwuk ngaba adung – Maring raga lan wong lian – Pateh sami – Antuk Ida manerapang

8. Mula salah ( Sang ) Harimbhawa – Rahayu wantah keapti – Tan sah ngamong kemanusan – Manut pidabdab Hyang Manu – Uli nguni weh tuladan – Manusmerti – Kardi Ida lwih utama

9. Puputang Sang Harimbhawa – Becik lanturang ne mangkin – Kasidane kaping lima – ASTENIA to kawuwus – Ne marti tan nahan corah – Yadin alit – Tan kapandung kaengkebang

10. Sang nyemak twara morahan – Makeh kedik taler salit – Iwange ngatut tan pegat – Sang Karma nutug satuwuk – Ne pelih manggeh ya iwang – Yamapati – Manggeh Dewan Keadilan

11. Sangkan apikin masolah – Mangden iwange tan nindih – Becik patute margiang – Anggen gelar jroning hidup – Satyane anggen piñatas – Mangden ngilis – Nuncap kamoksa bhawana

12. Taler manut Samuscaya – Ne madan corah malihin – Sapiniki kaunggahang – Di arep solahnya ngajum – Nanging di pungkur manyeda – Taler ngranjing – Laksana corah punika

13. Sang masolah kadi ika – Kasukane doh kapanggih – Di skala lan niskala – Corahnya nutug satuwuk – Yan kapungkur ya mangjadma – Lacur sakit – Kayu rigis ya tan pendah

14. Keto kebawos Sang Corah – Becik Dewa ya kelidin – Melah ngidih saking terang – Kedik nanging saking patut – Ne satamaka makelingang – Ring Sang Ngapti – Medana ring Sang Kalaran

15. Nanging pada kasengkala – Yan bes kedeh ne mangidih – Ne kidihin mengrawosang – Twara ngelah barang aku – Demit perihe to tunggal – Wohnya tunggil – Pada manggih kasengsaran

16. Malih kedik ya satwayang – Sang asthenia pinuji – Masih maug sila dharma – Reh tan demen ngawe rusuh – Nyama braya lan Pemerintah – Taler marti – Milu ngawe katreptian

17. Balik yan makeh Sang Corah – Nyama braya lan polisi – Milu tuyuh mangencanang – Yan iwang kabui laut – Peteng lemeh ya kajaga – Upas bui – Pada gemet manureksa 

18. Puput kewehe temokang – Somah panak ne kalahin – Bareng sedih mapangenan – Jengah kimude matumpuk – Twara tawang somah corah – Yan ambulin – Kewehe sinah pangguhang

19. Yan manuting karmaphala – Sang mangamong jiwa maling – Yan kapungkur ya mangjadma – Asing alih masa kewuh – Tur makejang ngawe jengah – Kula wargi – Kerasayang tan tolihan

20. Puput mondong kasengsaran – Purwa karmane manindih – Sedih kingkinge temokang – Keto Sang Masolah rusuh – Sangkan jani jwa dabdabang – Djharma jati – Ento anggon ngamong raga

21. Mirib sampun ya sinah – Artin asteniane jati – Becik ne mangkin kawitang – Sampunang masolah rusuh – Wireh seken ngawe rusak – Kadang wargi – Makadi ring jiwa raga

22. Ne mangkin pacing lanturang – Ke sad silane mangden uning – Nging sadurung kasinahang – Sang Sinom pacing katuwut – Anggen mamayonin satwa – Nah dumogi – Sang ginada ledang tinggal

SINOM

1. Ke sad silane jalan tatas – Ne madan AKRODA cening – Melah artinnya pang tawang – Akrodha marti tan brangti – Alep di tenagh di sisi – Di kayun galang satuwuk – Twara brangti yan kaceda – Masih tan ajum kapuji – Degdeg landuh – Sat dammar tan kapawanan

2. Sang nyidayang ngret indrya – Brangti ento minakadi – Tur ngentikang budhi hening – Dewa Bhuta sami asih – Nyama braya pada lulut – Ne ketil manadi elah – Aluh teka asing alih – Keto tuhu – Sang nyidayang ngret indrya

3. Nanging sang kongguhang krodha – Banget pesan ya tungkalik – Manahnya imput setata – Ne patut kasengguh pelih – Ne kawon kedalih becik – Peteng hati to kawuwus – Adoh saking tatimbangan – Beneh pedidi kagisi – Keneh unggul – Ne jatinnya dahat andap

4. Yan brangtine wus ngawasa – Nyapa akune ye mentik – Anake sami kandapang – Ban deweknya mrasa ririh – Sugih tur ngawasa gumi – Asing printah mangden tinut – Yan ada pade ne piwal – Musuh pitwi ya kadanin – Tur kasengguh – Pacang nyengkala deweknya

5. Keto sang kongguhang kroda – Banget mangresresin hati – Ne sinah ngawe sengkala – Nyama braya pada sengit – Ne takut dadi ya bani – Ngelawan pada ya ngerebut – Yan keto apa pahalannya – Sinah ngardi twara becik – Bilih patut – Adunge margi saratang

6. Becik walinin elingang – Sang nyidayang twara brangti – Salawasnya mangguh suka – Santosa jroning urip – I sadripu kasor sami – Twara buwin ya mangaduk – Jeg jemet ya dadi warga – I sadguna kewastanin – Tur sumanggup – Ngardi rahayu ring jagat

7. Dabdabang sening dabdabang – Masolah jwa apikin – Tata sila mangden tatas – Alep manis ngulangunin – Asoh saking perih nyilib – Sang satya becik ya tinut – Jujur mulus tanpa ceda – Apik mamersihin diri – Budhi luhur Dadi sunaring bhawana

8. Sesampune cening nawang – Solah sang tan nahan brangti – Jalan lanturang tugtugang – GURU SUSRUSA utami – Ned marti bhakti sutindih – Marep ring Sang Adhi Guru – Jiwa raga tan kaetang – Wantah bhaktine kasunggi – Keto bagus – Sang ngamong Guru Susrusa

9. Kadi ne sampun kunggahang – Solah Sang Bimane wyakti – Guru Susrusa kastawa – Kaping pitu silane luwih – Ento keanggen pemargi – Pasih dalem tan kaitung – Bayu sabda idep nunggal – Raga kembang tanpa urip – Kagedt sampun – Tangkil ring Dewa Rupa

10. Sang Bima Panduputra – Twara liyu ngamong indik -  Wantah siki katekekang – Ringkes nanging banget luwih – Sang Bima patut kapuji – Banget purusa tur teguh – Dewa bhuta lan manusa – Kemad sami tur mamuji – Asing tuduh - Sang Guru tan katulakang

11. Sang ngamong Guru Susrusa – Wantah masadhana bhakti – Guru Haji Guru Reka – Guru Wisesa makadi – Bhaktine tan parokalih – Nunggil sami jroning kalbu – Suka duka tan kaetang – Yadyan lampus saking bhakti – Tuduh Guru – Nika wantah keantosang

12. Asing tuduh kanggen marga – Antuk Sang Susrusa bhakti – Alas tukad pangkung jurang – Jroning kayun tan ketangin – Pengaptine wantah tunggil – Muputang salwir pituduh – Punika sadyan Sang Bhaktya – Pacang katur kanggen bhakti – Pang satuwuk – Ngawenang Sang Guru ledang

13. Ne mangkin becik lanturang – Silane ping kutus cening – SOCA ento kabawosang – Ne marti nirmala hening – Di sisi tengah apik – Bersih galang wyakti nulus – Adoh saking dosa maya – Loba kopa iri hati – Twara ngaduk – Jantos kaswapnapada

14. Ne ngranjing kaniskala – Bersih di kayun tan mari – Welas asih tan jangkayan – Marep ring I sarwa prani – Twara loba irihati – Ring anak ne nuju mangguh – Kawiryan miwah kasukan – Kalih tan nyeda di hati – Ring sang lacur – Muwuh ne banget katunan

15. Ento ne ngeranjing niskala – Di sekala mangkin etangin – Pengangge lan pekarangan – Maring raga minekadi – Mangden bersih turing apik – Yan ring raga twara rungu – Bisa ngawe gering lara – Tuyuh pacang manambanin – Banget imput – Sinah ngardi kasengsaran

16. Sandange masih buatang – Anggen ngaput kala dingin – Yan bes dingin masih bias – Ngawe lara buyan hati – Sakite matindih-tindih – Runrag watuke matumpuk – Bisa tumbuh dadi getap – Angkihane daas diis – Twara mampuh – Gawene makejang nungkak

17. Kalud lacur mawuwuh lara – Liyu sakite tandangin – Timpal mrasa tan tolihan – Nyamane kaden nyakitin – Mileh balyane takonin – Dipelihe ngawe buwut – Nyama braya pada sayang – Bes ngugu ken balyan ipit – Kanti tandruh – Ken deweke belog budag

18. Manut wacanan Sang Pradnyan – Tambet dadi dasar sedih – Irihati loba kopa – Ngigelang deweke jati – Matopeng ban takut sahi – Megong ban bobab satuwuk – Gelah timpale antepang – Kemo mai alihang pipis – Great gerut – Poatane ngendah pelag

19. Sangkan melah jua dabdabang – Ne dadua becik apikin – Ne sekala lan niskala – Adungang pang anut sahi – Kayune tuntun galihin – Haji papinehe patut – Selehin jroning agama – Susila anggen magehin – Sinah pangguh suka sekala niskala

20. Liyu suba kasinahang – Ring Ida Sang Pradnyan jati – Pidabdabnya I manusa – Ngalih sukane sujati – Ida wyakti banget asih – Jantos Ida purun tuyuh – Ngardi tattwa tatwiyan – JNYANA YADNYA kawastanin – Yadnya iku – Kebawos pinih utama

21. Sajeroning Panca Yadnya – Makweh yadnyane malih – DREWYA YADNYA kebawosang – Sang micayang artha brani – TAPA YADNYA ento malih – Purun ngated I Sad Ripu – Kama Lobha Moha Mada – Kroda miwah Irihati – Sami rapuh – Saking ragan Sang Pandita

22. SWADHYAYA YADNYA lanturang – Sang tan mari maurukin – Kancan tatwane utama – Ne mungguh ring Weda Smretti – Nitisastra lan tatwa wit – Ne patut agem tur gugu – Anggen sasuluh diraga – Mangden uning ring ne jati – Keto bagus – Marginin sampunang ima

23. Dulur malih YOGA YADNYA – Wantah Yoga maka margi – Pacang tangkil ring Hyang Titah – Purun ngutang sukan hati – Sukane mabalik sakit – Tan malih buat kapupu – Olih para Yogiswara – Apan patitise pasti – Nuju suwung – Ne doh saking dosa maya

24. Kadi ne sampun kunggahang – Jnyana yadnya pinih luwih – Amongan Sang Sang Sadhu Dharma – Kapradnyanan to kastiti – Nika kadanayang sami – Ring manusa kadin ipun – Nika tamba lwih utama – Penglukatan raga wyadi – Tresna sungsut – Sami sareng kawarasang

25. Amonto bapa nyatwayang – Soroh yadnya mangden uning – Sinah liyu yan kabawosang – Becik jani lan marginin – Wireh bapa maminehin – Sahenun anake hidup – Uripe bek misi yadnya – Tresnan panak tresnan bibi – Twara luput – Masih papindaning yadnya

26. Asing garap mawak yadnya –Ngalih pangan ngalih pipis – Miara cucu miwah panak – Matetulung ring sang sakit – Masih yadnya mangawakin – Keto nanak apang tahu – Sangkan matulung buatang – Ring sang lacur minekadi – Mangden ipun ruwat kasengsaran

27. Malih bapa makelingang – Pidabdab yadnyane sami – Mangden tan iwang pemargi – Dasarin ban dharma bhakti – Mangden pikolihe becik – Jagate sidha rahayu – Keto nanak mangden sinah – Pikenoh yadnyane jati – Nah pamuput – Durusang nanak mayadnya

28. Amonto piteket bapa – Cening buwin maminehin – Wireh liyu nu plajahang – Minab twara pacang lisik – Tatwane liyu nu singid – Cara mengkeb ya tan rungu – Minekadi ring sang tuna – Ne mekanti indriya sakti – Ne kadulu – Wantah wisayannya katah

29. Nanak bagus pyanak bapa – Jalan lanturang ne jani – Kasilane kaping sanga – AHARALAGHAWA pingit – Ane marti makirangin – Minakadi pangan kinum – Twara ngrapu kancan pangan – Ne sinah mangawe gering – Jroning kinum – Ne ngawe punyah ejohang

30. Tuake ne ngawe punyah – Arak brendi pateh sami – Pirantine makeh rusak – Hati ento minakadi – Kancan pangan twara legit – Sakit betege yan pesu – Wireh kancan sarin pangan – Twara lanus ya mamargi – Sinah ditu – Deweke manggih kalaran

31. Kemo mai mondong lara – Mailehan ya ubadang – Mara mrasa teken awak – Duk nguni bes mangulurin – Pangan kinum mangabehin – Engsap teken lara pangguh – Mupu punyah ajak timpal – Ngubungin pakitan hati – Nganti tuyuh – Panak somahe nabdabang 

32. Gelah awak gelah somah – Anggon mangulurin hati – Bangga kopane etohang – Yan kajum rasayang becik – Engsap ken kewangsan jati – Nanging pangakune kukuh – Mawosang wangsa utama – Ne doh saking sila yukti – Awak puyung – Bantas bek maisi bangga

33. Ane madan TRI MALA – Mamotoh mamunyah malih – Makadinnya wewadonan – Ento Tri Mala kadanin – Gemetang anto apikin – Mangdennya tan ngardi buwut – Ring somah lan nyama braya – Pemerintah ti makadi – Nah pamuput – Eda ampah makta raga

34. Samadi lan brata tapa – TRI YADNYA ento kadanin – Gemetang cening buatang – Anggen ngated indriya sakti – Raga dwesa minekadi – Punahang ya jroning kalbu – Mangda tan ngaduk mialang – Nuncap kanirbana bhumi – Genah luwung – Stanan Sang Budhisatwika

35. Amonto bapa manyatwayang – Aharalaghawa pingit – Becik pelajahang dewa – De bes banget mangulurin – Sadaranayang to sami – Mangden indriyane manuh – Manah ento ya gisiang – Mangden tan ganjah tur ganjih – Keto bagus – Becik jani ya dabdabang

36. Elingang dewa elingang – Idupe anitya jati – Tur ndikapan pacang seda – Twara ada mangorahin – Suka duka lara pati – Ento tuwah ne katepuk – Nah amonto jwa punggelang – Becik Sang Pucung balikin – Mangden lantur – Kasilane kaping dasa

PUCUNG

1. Cening Bagus – Mangden satwane ngelantur – Jalanke tangsehang – Yadyan suba banget wengi – Sambil muruk – Ngaliwatang mata kiap

2. Eda takut – Ngutang tuyuh ngaluh hayu – Buatang gemetang – Lautang jalanin cening – Koja bingung – Teken goda sasunglapan

3. Goda iku – Ne marupa endah erut – Lawat to jatinnya – Medal saking raga yukti – Ngudyang takut – Melah lingling apang pedas

4. Eda bingung – Tur bimbang jroning hidup – Gugu to sang karma – Ne mawak Hyang Titah jati – Yening patut – Da takut mati di jalan

5. Sang Hyang Tuduh – Uning wyakti Ida nuduh – Ne patut lan iwang – Sangkan adi kawastanin – Gelis Bagus – Dharma Prawrettine garap

6. Ida Sang Wiku – Becik tulad anggen sikut – Tan sah mamerihang – Nirmala jroning hredhi – Wantah adung  - Kanggen manampenin warga

7. Asih iku – Mula amongan Sang Wiku – Adoh saking sugat – Sangkan nampek kancan wargi – Keh sumuyug – Adung ngardi karaharjan

8. Ne pamuput – Kedasa sila maputus – Tan len APRAMADA – Ne marti setata eling – Cedang lanus – Twara ampah makta raga

9. Balik ipun – Yan ampah cening satuwuk – Tan mampuh phalannya – Asing bawosang tan misi – Ngawe imput – Reh prentahe katempalin

10. Sangkan Bagus – Apramadane satuwuk – Anggon ya sarana – Minekadi ngisi gumi – Eda angkuh – Ngalap kasore margiang

11. Sigug iku – Kutang encotang di pangkung – Pangda ngerubheda – Ngawe gering kulawargi – Ngardi buwut – Rasan patuhe ya ilang

12. Yan tan patuh – Satrune katiga nyusup – Nyilib cara ( Sang ) Baka – Munyi manis ngalih pati – Kadong nahu – Ngadok karirihan corah

13. Sangkan Bagus – Yan tan cengeh teken satru – Bisa kapacundang – Boya kedik naya silib – Ne pamuput – Eda ampah makta raga

14. Yaning sampun – Galang di kayune pangguh – Tekek ngamong sila – Muwuh pradnyan lwihing budhi – Sinah aluh – Ngamong wargi miwah panjak

15. Mula aluh – Sang Jitendriya manuduh – Manah lan indria – Mangden tan negul ngelilit – Sangkan Bagus – Buatang mangamong manah

16. Mula tuyuh – Ngamong manah yan tan kukuh – Ngetap netatiga – Dharana Dhyana Samadhi – Marga lantur – Pamargan Sang Yogiswara

17. Sangkan liyu – Ajak lacur jroning hidup – Apan twara kuat – Ngated manah lan indriani – Ne pemuput – Labuh kajurang sengsara

18. Mangden lantur – Tuture ngangsan ya adung – Kedeh manah bapa – Ngawuwuhin satwa malih – Tutur luwung – CATUR PRAWRETTI adannya

19. Tutur iku – Pakeling Ida Hyang Manu – Banget mautama – Amongan Sang Catur Warni – Keto Bagus – Kunggahang ring Samuscaya

20. Nging sadurung – Bapa nerangang ne catur – Becik ya I Durma – Undang ajakin magending – Reh Sang Pucung – Makejit ya ngewangsitang

DURMA

1. Mangkin bapa manuturang apang pedas – Ne madan Catur Prawretti – Catur marti patpat – Prawretti marti pidabdab – Bacakannya ento sami – Kapertama ARJAWA banget pinuji

2. Kaping rwa  ANRENGSANGSYA kabawosang – DAMA ngranjing kaping trini – INDRIYA NIGRAHA – Kaping empat to panelas – Becik mangkin yan artinin – Mangden terang – Pikenohnya jroning urip

3. Sang ARJAWA jujur sahi jroning manah – Kalih tyaga nekeng hati – Patut nyandang tulad – Marga bersih galang padang – Anggon kanti jroning urip – Ngawe ledang – Nyama braya kalih wargi

4. Manut bawos Shri Kresna kasinahang – Sang corah pacang mangungsi – Maring Mretyapada – Nging sang jujur – Kasekenang – Nyujur Brahmapada luwih – Salawasnya – Mamuktiang suka trepti

5. Mirib sinah Arjawa marti pasaja – Elah bersih jroning hati – Patut kotamayang – Jati paragayan Dharma – Sedeng tiru tur sungkemin – Nggen sawitra – Salawase tunggun urip

6. Ne ping kalih ANRENGSANGSYA lan bawosang – Artinyanya mangden uningin – Tan swartha kewalya – Parartha donireng jagat – Ento ne kastiti sahi – Mangden sida – Molih sukerti utami

7. Anrengsangsya mukyaning dharma kawedar – Patut kamong ring wong sami – Becik to limbakang – Pangleburan loba moha – Makadinnya irihati – To samian – Patut ruwat jroning urip

8. Sang Nresangsya kanggeh musuh maring jagat – Ngawe gering manyelehin – Becik ya icalang – Borbor antuk gni adnyana – Mangdennya tan mentik malih – To di manah – Pang suwud ngoda i cening

9. Melah jani lanturang ne kaping tiga – Solah Dama mahotami – Dama keartiang sang uning makeling raga – Iwang patut katatasin – Kancan corah ne ring raga kabersihin

10. Sang Darmika itep ngamong budhi cedang – Twara telad mawas diri – Ngintip ya i manah – Muwah ya i pancendria – mangden tan ganjah tur rusit – Kapretyaksa jantos – Tan polih manyilib

11. Kaduk caluh teka jemet ya samian – Twara tur nagihin – Jeg ngayuh manyerah – Kasinaran budhi pradnyan – Ne nyalang suci tur bersih – Manglanturang – Nuncap maring turyabhumi

12. Keto bagus sang mangamong budhi Dama – Kertawiweka kapuji – Putusing jnyana – Patut dadi  gurun jagat – Weda Tarka puput wyakti – Wicaksana – Patut ngabih jagat sami

13. Nah pamuput jalanke Bagus lanturang – INDRIYA NIGRAHA pinuji – Artosnya pang tawang – Pidabdab ngated indria – Makeh sang katunan budhi – Katungkulang – Ring naune mesi weci

14. Yadyan liyu satwane panggih di lontar – Sang ngulurin indriya sakti phalannya tan melah – Nanging tan sida melasang – Wireh naune tan sipi – Yan ampigang – Masa pocol siyu keti

15. Mula sulit mamunahang saktin indriya – Yan tan tasaking samadhi – Sangkan yan buatang – Suluhin ban sastragama – Susila maka pangabih – To gemetang – Uli rare kanti lingsir

16. Sang nyidayang ngeret indriya lan manah – Panjang yusa to kapanggih – Langgeng jroning yoga – Luput saking papa klesa – Pangan kinum wibhuh sami – Nyama braya – Sami asih tulus bhakti

17. Dewa Widhi masih tan telad pasweca – Bagyamanta jroning urip – Yening ngawatara – Bagus sugih gunamanta – Ngamong jagat panjak bakti – Keto wohnya – Sang jitendria sujati

18. Nah pamuput madak Hyang Titah pasweca – Cening manggih sadya sidhi – Sidha mamunahang – Kancan indriane galak – Bebas landuh suka trepti – Ento garap – Yadnya luwih mahotami

19. Cening Bagus amonto malu puputang – Ne madan Catur Prawretti – Pidabdab utama – Amongan Sang Catur Warna – Yan ento gemet marginin – Tan urungan – Sareng sami manggih trepti

20. Anggen paweweh kedeh Bapa menyatwayang – Ne kabawos Catur Warni – Ne sampun kaloktah – Rawuhnya saking negara – Hindustan kasub duk nguni – Pamugeran kancan Agamane sami

21. Ne mangripta Sang Catur Warna punika – Hyang Manu kasub ne rihin – Mangdennya kasidan – Jagate mangguh santosa – Dharmaning Sang Catur Warni – Kemargiang – Manut swadharmannya sami

22. Swadharman Sang Brahmana jani tatasang – Mangajah manguruk sami sahi – Sekancaning tattwa – Widhi Tattwa Atma Tattwa – Karmaphala ento malih – Punarbhawa – Moksah tattwa pinih lewih

23. Ento sami PANCA SRADHA  kebawosang – Hindu Tattwa ento jati – Telebang dimanah – Kasusilan anggen ngemban – Kawruhe anggen patitis – Kwicaksanan – Ento anggon manimbangin

24. Muwuh malih swakertin Sang Brahmana – Patut ngamong sila yukti – Madana tan telad – Brata tapa miwah yoga – Mayadnya mangening-ngening – To samian – Sang Brahmana jati

25. Sulit jati yaning bapa maminehang – Sang dadi Brahmana jati – Ento keranannya eda ampah makta raga – Becik ne mangkin kawitin – Tur elingang – Swadharmane apang pasti

26. Ane jani jalanke lanturang nanak – Swadharmane ksatriotami – Patut mamunahang – Kancan musuhe dursila – Tur tan rered nangun kerti – Ring payudan – Ne ngardi raharjan gumi

27. Sang Bupati sajawining ngamong jagat – Taler tan telad makerti – Ngardi dana punya – Mayadnya masih tan kirang – Ne sinah mangawe trepti – Kancan wadwa – Marasa sami kauripin

28. Keto cening swadharman Ida Sang Nata – Abot nanging dahat lewih – Yan ento kasidan – Sinah jagate santosa – Wadwane sami sutindih – Ngemargiang – Sekancan prentahe sami

29. Keto nanak swadharman Ksatriotama – Ne jani becik tatasin – Swadharmaning Wesya – Patut ngardi jagadita – Sandang pangan wibhuh sami – Ngardi suka – Kancan wadwan Sang Bupati

30. Lantur malih swadharman Sang Sudrawangsa – Taler tan telad ngastiti – Ngardi keraharjan – Malarapan dharmakriya – Ngaryanin tegal lan carik – Pakebonan – Mangden molih hasil bumi

31. Dulur malih swadharman Sang Sudrawangsa – Patut prenamya tan mari – Marep ring sang tiga – Brahmana Ksatria Wesya – Ne sinah tan ngalempasin – Pahamongan – Manut sastra loka dresti

32. Nah pamuput sang kacatur patut ledang – Saling tulung saling abih – Twara dadi palas – Patut adung ngardi melah – Mangden jagate sutrepti – Aptin Bapa – Madak adung makesami

33. Keto Bagus madak cening sida nerima – Ne kabawos Catur Warni – Manut swadharmannya – Makadi patut nyalanang – Catur Prawretti – Pamuputnya – Mugi sami manggih trepti

34. Nah amonto maka paweweh satua – Ne ngeninin Catur Warna – Aptin bapa nanak – Madak kecatur kasidan – Nyalanan Catur Prawretti – Pamuputnya – Mugi sami manggih trepti

35. Benjang malih kedeh bapa manyatwayang – Catur Paramita lewih – Ne jani punggelang -  Sang Durma jalan tulakang – Sang Sinom mangda ngatehin – Aptin bapa – Madak adung ya sang kalih

SINOM 

1. Sang Sisyawan matur sembah – Duh Sang Guru lwihing budhi – Sarat tityang manunasang – Catur Paramita lewih – Durusang tityang ndikain – I Tambet kaludan punggung – Inggih durus jwa medalang – Tityang nyadia manampanin – Tur sumanggup – Makadinnya ngelaksanayang

2. Cening Bagus pyanak bapa – Jalanke kawitang jani – Catur Paramitotama – Ageman sang satwa budhi – Becik ne jani kawitin – Bacakannya mangden tahu – METRIA to kapertama – KARUNA ne kaping kalih – Kaping telu MUDITA solah utama

3. UPEKSA ne kaping empat – Genep bacakannya sami – Balik jani bwin kawitang – Solah Matryane artinin – Pasweca atulung urip – Kukuh ngamong dharma sadhu – Duk manulung tan jangkayan – Baya pati tan ketangin – Dana tulus – Sadanan Sang Metryotama

4. Sang ngamong jiwa Metria – Tan kongguhang sigug brangti – Jeg naros mangardi ledang – Pangrasannya jati tunggil – Maring i sarwa maurip – Patuh ya kadulu – Atep ya tan kewarnan – Ne bedha wantah di sisi – Kulit palsu – Ya tan ngawe sagsag

5. Keto jati Sang Metria – Patut tiru sareng sami – Jati paragayan dharma – Teked ngamong budhi hening – Abhaya dana tan mari – Kanggen sadana pakukuh – Ngawe adung kula gotra – Ajak ngalih ne sujati – Sinah pangguh – Yan gemet ngemit di manah

6. Becik bapa manyatwayang – Sang Abhayadana jani – Yaning manut Samuccaya – Kardin Wararuci nguni – Sang Abhayadana jati – Twara nahan ngawe rusuh – Wantah asih kemargiang – Sahi ngaleganin wargi – Matetulung – Ento kanggen masedana

7. Sang ngamong Abhayadana – Yan bandingang banget luwih – Sang ngamong Drewya dana – Keto kasinahang cening – Sangkan ngawitin ne jani – Abhayadanane duluh – Ento garap ya pastika – Ydyan tiwas jroning hurip – Eda buwung – Ngarap ane  madan Dharma

8. Wireh suba kasinahang – Sang Dursila jroning hurip – Jati pawakan sengkala – Tan pendah kadi sang sakit – Nuju ke desane gerit – Sinah tambane tan apangguh – Ne kepanggih wantah kalaran – Sakit atinnya matindih – Keto Bagus – Sang nyalanang kadursilam

9. Ne jani jalan lanturang – Solah Karuna pedasin – Welas asih ke artiang – Asih teken sarwa prani – Sang katunan minekadi – Kirang pangan miwah kinum – Yadin sang katunan manah – Katulung ya kakantinin – Antuk tutur – Manutin sastra agama

10. Sang nyalanang asih sayang – Luput saking sedih kingking – Loba perihnya matinggal – Duk manulung saking aris – Twara ngetang untung rugi – Ne kaperih wantah hayu – Taler tan mari ngastawa – Nunas ica ring Hyang Widhi – Kancan hidup -  Mangdennya kerta raharja

11. Keto solah sang Karuna – Peteng lemah ya ngastiti – Karaharjaning Negara – Kalih wadwan Sang Bupati – Ring Dewa Bhuta tan lali – Minekadi ring Leluhur – Mangdennya asung nugraha – Manyundarang budhi hening – Ngawe adung – Bebas saking papa klesa

12. Cening Bagus Sang Sisyawan – Mudita jani artinin – Wirasannya apang tawang – Ngawe sukaning urip – Keto artinnya sujati – Solah I Patut sedeng tiru – Krana sang ngamong Mudita – Tan kongguhan irihati – Teka nahu – Ngawe kasukan di jagat

13. Sang Mudita sahi egar – Sing kucapang teka manis – Ngulangunin sang mirengang – Ngawe lega sang nyingakin – Reh mukane bungah asri – Solahnya manudut kayun – Ngalap kasor nekeng tuwas – Budhi halus muwuh bangkit – Nyandang tiru – Sang Mudita mahadika

14. Sewos pisan yan bandingang – Sang ngamong premada budhi – Bawos agal ngawe jengah – Masa ken deweknya ririh – Masa sakti turing sugih – Yan timpalin muwuh sigug – Ngeres hatine ningehang – Becik kirigin kalahin – Pangda milu – Kaliput ban gnipremada

15. Sang Premada banget ampah – Twara ngetang beneh pelih – Wiwekanya adoh pisan – Tatwannya banget tungkalik – Ya sanget demen kapuji – Timpalnya kandapang lawut – Katuduh panjak ketokan – Nanging Sang Mudita budhi – Twara nahu – Ngardi kemewehan timpal

16. Ne kecatur lan bawosang – Solah Upeksa pinuji – Misinggih ring sesamannya – Keto wirasannya jati – Sang Upeksa kadi dacin – Tukang timbang wyakti kasub – Twara ngelah rasa bina – Harimbhawa mirib patis – Sahi adung – Makta raga dahat wikan

17. Sang Upeksa wyakti wikan – Napi luwir ne kakardi – Yan sampun patut kerasa – Wawu raris kamarginin – Yan iwang keraseng hati – Tan pisan pacang keanut – Ring wong lian twara bheda – Kukuh ngamong ane adil – Sharma sadhu – Manggeh kanggen sukan jagat

18. Sang ngamong budhi Upeksa – Kancan sugat ledia sami – Wantah adung kamargiang – Anake ring raga patis – Tan bina wantah asiki – Tunggal sami jroning kalbu – Pangaptine masih tunggal – Wantah rahayu kejudi – Saling tulung – Dana punya kemargiang

19. Catur Paramitotama – Nyandang agem sareng sami – Anggen dasar paguyuban – Marepe ring kulawargi – Jalanke patuhe alih – Ento garap sinah luwung – Kancan karya bisa pragat – Nanging yan sugat pitindih – Sinah lacur – Bantas pocol ane bakat

20. Jalanke nanak tangsehang – Ngaryanin Dharma Prawretti – Wireh suba kasekenang – Hidupe anitya jati – Sahi mobab ngawe paling – Asing alih ngawe lacur – Asing uber ye ngejohang – Kadi nguber lawat tatit – Payu tuyuh – Belog kudune makada

21. Ane jati to sekenang – Alih bibit jroning hati – Dasarin ban sastragama – Anggon suluh kala wengi – Kasusilane apikin – Ento duluh marga lantur – Kapradnyanan anggen mungkah – Sekancan tatwane singid – Sinah pangguh – Jatin galange di raga

22. Ane jati madan galang – Bebas di kayun tan mari – I Sadripu twara ngoda – Santosa jroning hati – Wireh tetujone pasti – KAMUKTIPADA manuju – Mirib suba ke ya sinah – Artin galange sujati – Ne pamuput – Mugi cening manggih bagya

23. Mirib ada kagunannya – Yaning bapa manuturin – Indik musuhe di raga – I SAD RIPU to kadanin – Musuh nemnem dahat sakti – Duweg ngelilit manegul – Nanging sadurung nyatwayang – Becik ka gunung malali – Sambil nuwur – Dhyah Adri jegeg nyalang

ADRI 

1. Duh i nanak Adri cening hayu – Sangkan bapa prapta – Belin cening milu ngomong – Misadya mikarsa tulung – Pengiring i nanak mupuh – Belin cening Sang Sisyawan – Dot mireng tatwa SAD RIPU - Apang ya seleg ningehang – Mugi cening molih sela

2. Nunas lugra titiang Shri Maha Empu – Bes banget pasweca – Jantos Pranda ngerawuhin – Ring pondok titiang i jugul – Satmaka amerta runtuh – Daging wacanan Sang Tapa – Puput titiang mangelungsur – Durusang wacanen titiang – Sareng i beli Sisyawan

3. Duh Sisyawan cening nanak Bagus – Jalan ya kawitang – Bapa jani manuturin – Daging ne madan Sadripu – Musuh nemnem teges ipun – Melah jani bapa nyarca – Mangda sampun cening bingung – Sangkan apikin mirengang – Apang saking seken banban

4. Manut Agastya parwa puniku – Ditu kapidarta panyarcan sadripu cening – ALASYA pertama ipun – NiDRA kaping dua puniku – BHAYA ane kaping tiga – RAGA ne kaping kecatur – Kaping limannya DWESA – Ne kaping nem madan TRESNA

5. Ngawit Alasya tuturang malu – Ngekoh ya tegesnya – Idepe kiap tan mari – Ngekoh ngarap sila hayu – Ring kandan Dharma tan cumpu – sok ada eling amatra – Rikalan ipun seduk – Wahu ipun makritipan – Ngambil sane pacang teda

6. Dewek ipun baat tur ngeliud – Elinge nerawang – Cetanannya satsat mati – Budhi tamahe ngawengku – Sat gulem ring manah ipun – Sangkan kobet ngarap karya – Sok bantas meled mamupu – Kangen ngupedita awak – Tan pisan renga ring jiwa

7. Apa buwin Nidrane to Bagus, anak seken ngengsap – Kajagrannya banget tipis – Nging loban ipune suluk – Mitungkas ragan Sang Sadhu – Apan kasengguh pamialang – Antenge kasengguh tuyuh

8. Pitangane ya seringan buwut – Makilit madukan – Jroning ngulah sukan diri – Twara pesan ya mangitung – Solah mawasana hayu – Numlek kasuka sekala – Jiwannya inggihan lebur – Twara dados pwilangan – Olih Sang Maha Wimoha

9. Ne madan Bhaya kawitin bagus – Takut kategesang – Makadinnya takut mati – Kabatek melede hidup – Somah panak pang mapunduh – Takut kalahin kasukan – Ngalahin masih tan purun – Sesahi bayune rundah – Twara nawang kandan jagat

10. Dija se ada kancaning tumbuh – Twara memangguhang – Suka duka lara pati – Apan mula tattwan ipun – Maya anitya puniku – Nganutin ksanika tattwa – Kewanten sang bhaya iku – Apan tan tangeh ring jagat – Sangkan nandang ketakutan

11. Madana kama tegesnya bagus – Legane pupuang – Duk patemon laki istri – Metu ya leket kapulut – Lali ya ring tatwan hidup – Ne yogya tangseh utsaha – Mangden sida gelis luput – Keles ring sangsara jadma – Pang suwud kecakra bhawa

12. Dwesa runtik ya tegesnya bagus – Pada lawan krodha – Runtik ken ne tan cumponin – Saat makite manundung – Reh manah ipun tan adung – Wireh papinehe buyar – Twara ngetang iwang patut – Sok ngulah suka sekala – Banget tan lingu ring jiwa

13. Nguleng hidupe mangulah tuwun – Ring sukan indriya – Daging jagate uberin – Sang jiwa manadi sungsut – Apan tan nahan masambung – Maring Ida Sang Hyang Sangkan – Ne seken mapaica hidup – Sangkan Sang Jiwa sat bhaya – Keleb ring bhawa arnawa

14. Ne madan Tresna kawitin Bagus – Leket kategesang – Ring daging jagat puniki – Ring dewek somah lan sunu – Tresnannya banget mamulut – Miwah maring kasugihan – Irika banget mategul – Rasa lampus yan matinggal – Yan ngalahin masa bhaya

15. Keto sakit tresnan punika – Ririh memangkedang – Sang tambet dumadi hurip – Sangkan yeh kawah kasengguh banget dingin banget kebus – Awanan ida sang jagra – Ne ebek tattwa kaweruh – Tan mari ida utsaha – Megat pamebbed I Tresna

16. Awanan sang dadi jadma iku – Yogya apik banban – Tan mari maninjo diri – Mangingetin iwang patut – Ne nyandang kutang lan duduk – Anutang ring dharma tattwa – Ne seken maphala gayu – I Sadripu nyandang kutang – Tundung ulah saking raga

17. Nah amonto ne madan sadripu – Twara nahan - Telag unduk ipune nyakitin – Marep ring sakancan hidup – Sahi ngawe manah buwut – Makadi Sang Raga Dwesa – Ne mula pukuh Sadripu – Twara pesan nyandang ampah – Ento sang mawak manusa

18. I Sadripu ngawitin ya tumbuh – Di bhuwana manah – Ditu mentik dadi bibit – Ngawe gering agung – I Manusa mangden durus – Lali maring Sang Hyang Atma – Katuduh mangden manyurat – Maring suka kabhyudayan – Sane matanggu sangsara

19. Awanan yogya tuwah di kayun – Ditu patitisang – I Sadripu ya tandingin – Apang sampun jantos pesu – Madrekeman maring unduk – Wireh yan jantos ke jaba – Mara bakat lawan bagus – Sinah sulit manyidayang – Bisa cening kapacundang

20. Ngekoh libut raga – Dwesa takut – Miwah to I Tresna – Talektek nyandang pedasin – Rikala dimanah tumbuh – Sekenang tunjel pang puwun – Haji api kapradnyanan – Empetin pang da mamesu – Mawisaya ya ring jagat – Apang buwung manyengkala

21. Nah amonto malu cening bagus – Bapa midartayang – Kakandan SAD RIPU cedning – Madak sida cening bagus – Menang ngelawan SAD RIPU – Jalan jani ateh bapa – Simpangin sang Sinom Bagus – Sanget iseng kayun bapa – Nyatwa ajak Isrinata

SINOM 

1. Becik malih ya kawitang – Ne madan Dharma walinin – Dharma marti kepatutan – Anggon kanti jroning urip – Yaning patute marginin – Sinah rahayu kapangguh – Nging yan Adharma jalanang – kewehe banget puponin – Ngawe lacur – Bulak balik manumadya

2. Reh ne madan kepatutan – Dahat mangebekin gumi – Becik jani jalan carca – Kepatutan Sang Hyang Rawi – Nyinarin jagat tan mari – Nguripin sarwa tumuwuh – Taler munah kancan lara – Keto dharmaning Hyang Rawi – Pageh puguh – Maweh sundaring bhawana

3. Hyang Sasih masih tan pegat – Manyundar galang di gumi – Ledang maweh kalanduhan – Ngicalang petenge sami – Keto dharmaning Hyang Sasih – Patut puji ngawe nawu – Ngetisin manah sang nyingak – Ngusanang sang nuju brangti – Sedeng tiru – Sasibrata mahotama

4. Hyang Agni masih tan kalah – Nyalanang dharma tan gingsir – Ngantinin manusa pada – Ngolah saluwir ne keapti – Yaning tan api ngantinin – Sekancan karya tan puput – Sandang pangan lan wahana – Sinah tan sida memargi – Kado durus – Yan Hyang Agni nulak dharma

5. Nanging yan tan tatas nawang – Kagunan apine jati – Bisa ngawe rusak jagat – Sangkan gunannya pang uning – Wireh yan tan deweke rusit – Umah timpal bisa puwun – Nanging yaning anggen nyakan – Bisa ngalebengang nasi – Keto Bagus – Gunan apine pang tawang

6. Jani jalan ya lanturang – Dharmaning manusa jati – I Bapa patut ya sayang – Ngabih pyanak miwah rabi – Ngamong sasana pang apik – Yayah Ibu patut nguruk – Pianake mangden pradnyan – Sisula Susrusa bhakti – Ne pamuput – Mangden bhakti ring Hyang Sangkan

7. To dharmaning yayah rena – Guru sesana pinuji – Wyakti abot nging utama – Ento patut ya sungkemin – Pamargin Sang Grehastadi – Ngardi pyanak budhi luhur – Maweh teladan di jagat – Anggon nuntun kulawargi – Sida mangguh – Swarga sekala niskala

8. Putra sasana satwayang – Dharmaning putra sujati – Marep ring Guru Rupaka – Guru Haji minekadi – Bhaktine tan paro kalih – Cucud nuluh saking patut – Jiwa ragane aturang – Guru Susrusa marginbin – Anggon rurung – Nuncap Swargane utama

9. Haji lan Putra Sasana – Utamannya pateh sami – Nanging dasarin ban dharma – Pikolihnya masih tunggil – Nging yan adharma marginin – Nrakane tan urung pangguh – Keto nanak apang tatas – Swadharman putra lan haji – Nah pamuput – Swadharmane to margiang

10. Malih bapa makelingang – Swadharman manusa jati – Sajawining ngalih pangan – Patut melajah tan mari – Manyama braya pang uning – Makadi patut tan surud – Mawas diri ngamong raga – I Sadripu mangden lilih – Ento patut – Garap tur sampunang ampah

11. Keto nanak apang tatas – Ring kandan dharmane jati – Madak nanak twara bimbang – Maminehin ne sujati – Suba kedas buwin galihin – Mangden nanak sida mangguh – Ne madan jatining solah – Anggen ngemban Sanghyang Hurip – Tur pamuput tan malih kapunarbhawa

12. Sang Sisyawan matur nowal – Saha tan lali ngabhakti – Tur ngaksama ring Sang Tapa – Duh Ratu sang lwihing kerti – Bilih yan tan kapasisip – Kedeh tityang mengelungsur – Paweweh daginging tattwa – Indik Tri Parartha luwih – Inggih Ratu – Durusang ndikain tityang

13. Uduh nanak bagus sayang – Bapa mrasa legeng hati – Ban nanak cucud manunasang – Indik Tri Parartha jati – Bapa ngindayang nuturin – Nanging sadurung kawuwus – Atehin ya I Srinata – Sambil ngalih cening – Truna Pangkur – Mangden sareng mamupuhang

PANGKUR ( 30 )

1. Nanak bagus pyanak bapa – Mai malu – Nampekang cening malinggih – Jani melahang mangrungu indik Tri Parartha Tatwa – Mangden sinah – Becik artinnya pang weruh – Tri tetelu keartiang – Para jagat keartinin

2. Artha mearti tujuan – Mirib sampun – Sinah artinnyane jati – Tri Parartha suksman ipun – Wantah sang ngardi raharja – Mangden sida – Jagathitane kepangguh – Melah ne jani etangang – Bacakannya siki siki

3. ASIH  BHAKTI kalih PUNYA – Maketelu – Tri Parartha kewastanin – Becik artinnya pang tahu – Palih palih midartayang – Asih iku – Welas asih to kawuwus – Patut agem tur margiang – Anggen dasar jroning hurip

4. Kadi ne wus kasinahang – Asih iku – Maka dasar jroning hurip – Patpat bebadihan ipun – Catur Paramitotama – Paragayan Dharma jati banget luhur – Amongan Sang Sadhu Dharma – Kanggen ngardi jagat trepti

5. Indik Catur Paramita – Bapa sampun – Midartayang siki siki – Elingang sami to bagus – Makadinnya laksanayang – Keto tuhu – Elingang jroning hidup – Rahayune jwa kardiang – Karya agung mahotami

6. Ne jani jalan lanturang – Punya iku – Patuh ken Dana kartinin – Sangkan iraga katuduh – Ngemargiang dana punya – Nanging apang – Patut twara salah unduk – Mangden danane tan nyasar – Keto Bagus apang eling

7. Becik nanak apang tatas – Ne kawuwus – Catur Dana ento sami – Patpat pawilangan ipun – Drewya Dana kapertama – To sang ledang – Maicayang pangan kinum – Tegal carik miwah artha – Saking legawaning hati

8. Kaping kalih Pria Dana – To sang tulus – Madanayang rabi – Ne sinah sangkaning patut – Manut kecaping sesana – Ngawe ledang – Sang manuduh lan katuduh – Keto masih sang manunas – Sami patut manut indik

9. Lawutang jani pedasang – Ne ping telu – Sarira danane luwih – Ne sujati saking purun – Madanayang jiwa raga – Kacaruang – Kanggen ngardi jagat landuh – Tan pendah kadi Ksatriya – Mayuda melanin gumi

10. Keto bagus apang tatas – Ne kecatur – Melah jani ya wilangin – Abhayadana kawuwus – Bapa suba manyinahang – Wantah Ida – Sang tan sah masolah hayu – Ento sahi kadanayang – Marep ring i sarwa prani

11. Amonto malu puputang – Ne kawuwus – Catur dana ento cening – Ne jani jalan ya tulad – Ne madan bhakti terangang – Mangden sinah – Arti lan tatuwek ipun – Bhakti ento keartiang – Sang uning narosang hati

12. Manut bebawos Sang Pardnyan – Ne kecatur – Patut bhaktinin tindihin – Tan lian Sang Catur Guru – Guru Rupaka pertama – Ne ping rua – Guru Pengajian bagus – Ne ping telu kasinahang – Guru Wisesa utami

13. Ane ping catur bawosang – Ne kasengguh Guru Swadhyaya sujati – Tan sewos Ida Sang Hyang Tuduh – Ne maka guruning jagat – Lintang pradnyan – Sarwadnya Ida kasengguh – Patut bhaktinin sekenang – Ne mula kawitan jati

14. Ne mangkin Bagus Sisyawan – Raris matur – Banban halus sredha bhakti – Duh Ratu Sang Maha Mpu – Tityang banget nyuksemayang – Ring paswecan – I Ratune banget luhur – Indik Catur Gurutama – Ne patut bhaktinin mami

15. Tityang banget ngerasayang – Dih Shri Empu – Ring Paswecan Ida sami – Pertama ring yayah ibu – Tan lian Guru Rupaka – Ngupadita – Saking alit jantos luhur – Paswecane tan jangkayan – Minab tan sida taurin

16. Taler marepe ring Ida – Ne kawuwus – Guru Pengajian jati – Ledang micayang kaweruh – Pangruwatan Nawa mala – Lan Awidya – Ne dados dasar pakewuh – Aptin tityang mugi sida – Manggih kanirmalan budhi

17. Lantur ring Guru Wisesa – Taler patut – Tityang bhakti lan sutindih – Reh Ida ngabih mangempu – Ne patis Wisnu maraga – Mrasa tityang – Tan patut manulak tuduh – Dyastu mangguh pati baya – Bhaktine pacang marginin

18. Pamuput Guru Swadhyaya – Ne manguduh – Kancan mauripe sami – Patut tityang bhakti nulus – Hutang tityang banget katah – Makadinnya – Ida ledang maweh hidup – Pamuput tityang ngaksama – Kadi purun mapiuning

19. Gelis nyawis Sang Atapa – Banban halus – Nanak sang ngawasa diri – Bapa banget muji bagus – Tur tan mari ngastawayang – Mugi sida – Nanak mangguh ne rahayu – Makadi Sapta Wredhiya – Manut Sloka Pangastuti

20. Om Hayu Wredhiyasa Wredhi – Wredhi Pradnya Suka Sriya – Dharma Santana Wredhis Ca Santute Sapta Wredhaya

21. Yata Meru Sthito Dewam – Yawad Gangga Mahitale – Candrarka Gagana Tawat – Tawa-Twa Wijayam Bhawet – Om Dirghayur Astu Tat Astu Astu Swaha

22. Sang Sisyawan matur nimbal – Mugi ratu – Tityang tan katulak carik – Tityang i tambet tur punggung – Kantun loba mapinunas – Daging tattwa – Nanging sadurung kawuwus icenin tityang nangkilang – I Kumambang rempuh manis

MAS KUMAMBANG

1. Duh Sang Tapa – Ndaweg tityang mapiuning – Nging banget ampura – Kadi purun manangkilin – Mogi tan kataman tulah

2. Yan tan iwang – Nahan tityang mamanggihin – Ring Bhagawadgita – Daweg Ida Sang Kerti – Mapinunas ring Sang Kresna

3. Prabu Kresna – Mawosang tatwaning budhi – Kapalih midarta – Kedadosang kalih bagi – Dewi lan Asuri Sampat

4. Tityang nunas – Mugi Sang Tapa ngicenin – Indik budhi tatwa – Dewi Sampat lan Asuri – Mangden tityang sida tatas

5. Sang Atapa – Mangandika sada aris – Banban duga duga – Uduh nanak sayang luwih – Pirengang sampunang ima

6. Melah nanak – Satonden bapa ngawitin – Indayang wangsitang – I Smarandhana pang tangkil – Pacang tunden mamupulang

7. Inggih Ratu – Gelis tityang mapiuning – Munggwing nyaman tityang - I Smarandhana wus tangkil – Durus lugrahin wacana

SAMARANDHANA

1. Uduh Smarandhana cening – I nanak bahu prapta – Malinggih cening lawutang – Sangkan bapa mamesenang – Gumanti ajak masatwa – Belin cening nunas tutur – Dewi lan Asuri Sampat

2. Inggih Ratu Sang Maharsi – Durusang wacanen tityang – Daging tityang mangiringang – Sabuh wacanan Sang Tapa – Mangden i beli Sisyawan – Resep mamirengang tutur – Daging tatwane utama

3. Uduh Sang Sisyawan cening – Melahang nanak mirengang – Bapa ngawit manyatwayang – Manut pitaken I Dewa – Palih Bapa pidartayang – Apang de ngawenang bingung – Penampine pang de iwang

4. Jroning manusa hurip – Dini di mretyabawana – Duang palih ya abahnya – Pertama to Dewi Sampat – Ane ngelah abah Dewa – Asuri Sampat buwin bagus – Ento agol keraksasan

5. Abah Dewane kawitin – Ne nongos maring manusa – Ento sang mambek purusa – Budhi bresih wicaksana – Seleg mayoga mayadnya – Matapa madana kukuh – Satya tur ngeret indriya

6. Seleg ngulis Sang Hyang Haji – Tekek mangamong kadharman – Degdeg tan loba tan krodha – Kalih twara mamisuna – Welas asih banget sayang – Tan misakti kancan hidup – Kalis ring suka byudaya

7. Ring bawos tan mari apik – Alap kasor halus banban – Tan ngardi sengsayan anak – Cestakara turing natya – Twara iri tan premada – Tangseh makardi rahayu – Tan kobet maweh ampura

8. Sat talaga jimbar suci – Ngardinin sukan i angsa – Aketo sang Dewi Sampat – Membah bawose tan pegat – Ane presida mamunah – Salwir kakobetan kayun – Sat tukad madu amerta

9. Lwir kedapan taru manis – Mangkep kedapan angsoka – Ngiderin tepin talaga – Sapunika kalemuhan – Solah angga kalih tangan – Sang Dewi Sampat puniku – Tan mari dados tuladan

10. Dulurin mukane asri – Semita luir sarkara – Mahasren antuk cacingak – Ne halus lwir gula drawa – Sapaut ring tunjung sekar – Mawarni warni ne munggah – Maring telaga punika

11. Kancan solahe utami – Ne maug dharma sadhana – Ento nuju kalepasan – Tur ngungsi jagathitartha – I Stula Sarira suka – I Suksma Sarira landuh – Keto nanak Sang Sisyawan

12. Nanak Smarandhana manis – Minab lesu i nanak – Reh suba puput nyatwayang – Pamargan Sang Dewi Sampat – Dadi mantuk nging sambilang – Tunden I Adri pang rawuh – Apang ada ngiring Bapa

ADRI

1. Nunas lugra tityang Shri Mahampu – Ndaweg kasampura – Dosaning tri kaya mami – Jantos Sang Empu manguduh – Bahu tityang tangkil rawuh – Antuk bingungang kakencan – Ombak manahe mangliput – Durus Sang Resi pasweca – Lugrahin tityang wacana

2. Uduh nanak Adri cening hayu – Lega kayun Bapa – Mireng buat atur cening – Anak mula keto hayu – Kakandan jadmane hidup – Kawengku ban rajah tamah – Loba kopane ngaliput – Awanan saat utsaha – Gediang saking pangrasa

3. Sangkan Bapa mesenang pang rawuh – Gumanti misarat – Dewek cening pang mupuhin – Satwan Bapane pang tumus – Belin ceninge mangrungu – Ia I Bagus Sisyawan – Nah jalan kawitin hayu – Tugtugang pidartan Bapa – Solah Sang Asuri Sampat

4. Tingkahe kasar libut tur ngagu – Demen nyumbung awak – Mapi mapi sadhu budhi – Bregedegan sahi inguh – Tan pegat ngawe pakewuh – Ngenemin loba angkara – Lempas saking sila hayu – Seleg nungkasin kedharman – Maboya ring kecap Weda

5. Bangga reh rumasa sugih wibhuh – Indiknya mayadnya – Twara nekeng tuas bhakti – Kanggen babanggan tur jumbuh – Mabudhi ngendong I Lacur – Apang molih kakasuban – Kakuasan makadin ipun – Ditu tekek mapangkedan – To manggeh pasunarikan

6. Kandugi ipun mangorta purun – Iriki ring jagat – Reko twara ada Widhi – Kalih twara ada patut – Sesana susila muwuh – Karmaphala lan wasana – Kocap tan wenten puniku – Bantas indike ring jagat – Marurung karma indriya

7. Ring sasungkeman rusit mangengsut – Jiwan ipun rusak – Kaweruh ipune weci – Utsaha makadi rusuh – Tangseh ngardi gumi uwug – Kanggen ngubungin Angkara – Ngenemin sakaptin ipun – Sok mikolih ring deweknya – Tan ngawilang kretaghana

8. Wireh nyerah kapacundang hidup – Olih sang matsarya – Reh ento kasengguh gusti – Ne kangkat kasembah suhun – Reh manah ipune libut – Tan ngantenang pajagatan – Tekepin gulem matumpuk – Raga dwesa lan matsarya – Irsya loba lan moha

9. Edot ipune tan nanggu nanggu – Sukaning budaya – Ento kasengguh patitis – Ento ya tangseh kaburu – Reh kasengguh suka agung – Ditu tekek mapangkedan – lali ya ring dot puniku – Sane nuntun mangojogang – Ngungsi kamretyubhawana

10. Jani ene dadi gelah aku – Bwin mani totonan – Jani ene jemak kai – Mani ento rampas aku – Reh apa edotang aku – Sinah dadi gelah ira – Keto I Lobha mangrumuk – Mabudhi ngawasa jagat – Tan ngitung carane nyemak

11. musuhe ane suba keamuk – Satrune totonan – Masih lakar amuk kai – Reh kai pawakan Tuduh – Kai panguasa agung – Ane nyandang mamuktiang – Kancan kasukane wibhuh – Keto Sang Asuri Sampat – Twara ngelah harimbhawa

12. Dewi lan Asuri Sampat puput – Bapa midartayang – Marep teken ragan cening – Melah kawitin ya bagus – Nyamane sami pang rawuh – Saraneman ngiring bapa – Ngonjakang tatwa Hyang Tuduh – Wireh ngatuju purnama – Sambil majagra di Pura

13. Nunas lugra tityang Shri Mahampu – Mangkin rereh tityang – Keni ipun rawuh sami – Jalan jani Adri Ayu – Pamitin Ida Sang Empu – Raris sang kalih mamarga – Tan ucapan gelis rawuh – Maring genah sawitrannya – Sang Adri midarta banban

14. Kapertama Aum Swastyastu – Ne rawuhang tiang – Ring para sawitra sami – Sangkan tiang sida rawuh – Mawit wacanan Sang Empu – Tiba ring para sawitra – Pang sida tangkil sumuyug – Nuju purnamane benjang – Sarat mamuspa ring pura

15. I Kumambang Durma miwah Pucung – Sinom Smarandhana – Pangkur Ginada Ginanti – Mangkin saraneman sampun – Sadya nangkilin Sang Empu – Benjang kala pasemengan – Marerod sami lumaku – Tan carita maring awan – Sampun rawuh ring pasraman

16. Sareng sami mangkin wus sumuyug – Saha masang sembah – Ngabhakti maring Sang Resi – Sawusnya raris Sang Empu – Ngandika bawose harum – Cening nanak pyanak bapa – Sadya cening sida rawuh - Nyanan jalan tulus lunga – Ka Pura ngaturang sembah

17. Tan ucapan mangkin sampun rawuh – Ring jro prayangan – Tur sampun sami malinggih – Upacara wus keatur – Banten suci adin ipun – Sang Tapa raris ngandika – Cening hayu nanak bagus – Jalan ne jani kawitang – Tikase ngaturang sembah

18. pangawit Asana ya kalau – Raris Pranayama _ Karasodana ngruntutin – nanak Sang sisyawan Bagus – Mangkin i nanak manuntun – Kala nguncarang Tri Sandhya – Sang Sisyawan raris muwus – Jalan adi sagerehan – Ngawit nguncarang Tri Sandhya

19. Sesampun Tri Sandhya wus keatur – Raris Sang Sisyawan – Matur ring Ida Sang Resi – Ne mangkin durus Sang Empu – Sang Tapa raris mawuwus – Nah cening ajak makejang – Iring bapa mangalantur - Ngamargiang Panca Sembah – Jani bapa mangawitang

20. Kapertama sembah puyung katur – Ne muat wirasa ngalingga – Yang Sang Hyang Widhi – Ring agradnyana mungguh – Masekar puspa tanalum – Mangkin ring Shiwaraditya nyembah – Masedana santun – Mugi ledang nganugraha – Manyundarang budhi pradnya

21. Ne ngeranjing sembah kaping telu – Ring kawitan jagat – Sang Hyang Brahma Prajapati – Ugi masedana santun – Satsat guru yaga katur – Ring Ida Hyang Pitamaha – Ne kasengguh Bapa Agung – Moga ledang nganugraha – Kajagaran ring Sarwa mawak

22. Tumusang sembah kaping catur – Kawangen puspanya – Katur ring dewa dewati – Makadi ring Hyang Sinuhun – Manut linggih Hyang Kasungsung – Ane katuran piodak – Mugi pinunase tumus – Molih sukerta raharja – Jagat kalawan dagingnya

23. Ring pamuput buwin sembah puyung – Ne muat wirasa – Pamantukan dewa dewi – Matinggalan teduh landuh – Mentik ya sarwa tinandur – Wibhuhing sandang lan pangan – Kaicalan sarwa letuh – Pamuputnya mangden sida – Dirghayusa paripurna

24. Panca sembahe nanak wus puput – Lan jani lanturang – Sagrehan ngaturang gurit – Yan sampun gurite puput – Lawutang nunas kakuluh – Mawija miwah masekar – Yaning ento suba puput – Jalan matangi i nanak – Negak di bale paruman

25. ne mangkin sami sagrehan sampun – Wenten ring paruman – Sami sampun masang linggih – Pedek mangiring Sang Empu – Sang Empu raris amuwus – Cening nanak pyanak bapa – Melahang jani mangrungu – Upanisad Widhi Tattwa – Nanak Sinom mamupuhang

SINOM

1. Hidupe dadi manusa – Agetang tur ya apikin – Satmaka jan ngamunggahang – Manuncap swargane luwih – Mangden suwud sedih kingking – Manjakin keranjang uwug – Ne maobah ya setata – Becik Hyang Atma patitis – Ento duluh – Anggon nunggil ring Hyang Suksma

2. Cenik sami pyanak bapa – Bapa banget muji cening – Ban kuat nanak manegak – Mangrungu tuture jati – Madak cening sihin Widhi – Dadi anak dharma sadhu – Wenang nguruk kapatutan – Wibhuh sisya sredha bhakti – Sahi adung – Ngawe karaharjan jagat

3. Bwin bedik bapa nyatwayang – Satonden cening arip – Mugi cening tan ngobetang - Bapa ngawewehin malih – Pangegane ring Hyang Widhi – Mangden teleb cening nyungsung – Jalan ke jani kawitang – Pikenoh sang ngugu Widhi – Dadi gugu – Kenken kapineh di manah

4. Mirib cening suba pedas – Agamane keh nyungkemin – Nasrani Islan lan budha – Kong Hutsu Hindu makadi – Sami ngega ring Hyang Widhi – Wastannya bheda kawuwus – Nging ne kapti wantah tunggal – Mangden landuh jroning urip – Tur kapungkur – Sidha nunggil ring Hyang Titah

5. Ne kasengguh Sanghyang Titah – Ngebek ring jagate sami – Ida Ngutpeti daging jagat – Nyetiti prelina raris – Ida wyakti dahat sakti – Ida uning mraga siyu – Masih uning mraga tunggal – Taler wikan meraga tri – Duk puniku – Hyang Trimurti kebawosang

6. Brahma Wisnu lan Iswara – Ento Trimurti kadanin – Duk ngutpeti daging jagat – Brahma Ida kaparabin – Duk miara daging gumi – Hyang Wisnu Ida kawuwus – Puput duk Ida mrelina – Sedaging jagate sami – Duk puniku – Shiwa Rudra kabawosang

7. Duk Ida mraga aksara – Ang Ung Mang aksara pingit – Tri aksara kebawosang – Nanging duk meraga tunggil – Omkara pranawa suci – Sarin aksara kasengguh – Yan ambil ring kahuripan – Sang Hyang Atma kawastanin – Ngawe hidup – Sarwa pranine makejang

8. Hyang Atma langgeng setata – Njiwanin sarwa maurip – Twara bina ring Hyang Titah – Atep sahi mraga tunggil – Brahman Atman Aikhyam patis – Keto ring Weda kawuwus – Mugi cening twara bimbang – Ring Upanisad bawosin – Ne kawuwus – Sarwa Idam Khalu Brahman

9. Makeh yan malih bawosang – Parab Ida Sang Hyang Widhi – Nanging ne kangkat bawosang – Kawentenan Ida jati – Mraga suci hening bersih – Meraga sampurna puput – Ida mraga nirwikara -  Wyapi wyapaka ngangobin – Mraga suwung – Twara bakat ban ngetangang

10. Malih Ida kabawosang – Meraga Asung tur Asih – Marep ring i sarwa bhuta – Minekadi maweh hurip – Sarwa tumuwuh lan prani – Maduluran pangan kinum – Makeh malih yan bawosang – Pakardin Idane sami – Cutet ipun – Ida wyakti mraga sweca

11. Asing kapti kapaswecan – Nanging ke masih dasarin – Ban utsahane tan telad – Ne medasar dharma jati – Sinah panggih asing kapti – Nanging yan ngekoh di kayun – Ngulah aluh mangda bakat – Loba kudu banget perih – Twara patut – Anggon dasar mapinunas

12. Sang uning mapinunas – Ne medasar tulus bhakti – Loba perihnya kakutang – Wantah galange di hati – Ento kanggon dasar bhakti – Mapinunas ring Hyang Tuduh – Maweh kasantosan manah – Adoh saking dosa weci – Mangelantur – Nuju katurya bhawana

13. Walinin malih bawosang – Kawentenan Sang Hyang Widhi – Dibyacaksu wyakti Ida – Tan pacingak uning ngaksi – Tan pakarna mamiragi – Asing singid ya kadulu – Ida wyakti dahat pradnyan – Gurun jagat Gurun langit – Patut sungsung - Tur bhaktinin ajak onya

14. Yan deweke saja ngega – Hyang Widhi ada sujati – Tur Idane mangadakang – Saking Yadnya Welas Asih – I raga patut sutindih – Yogya bhakti siang dalu – Masih dasarin ban Yadnya – Asih tulus nekeng hati – Keto patut – Sang manuluh Bhakti Marga

15. Sang manuluh bhakti marga – Wantah bhakti ne kastiti – Kanggen nuncap kanirbanan – Marga ringkes dahat becik – Teka aluh tan ngobetin – Saranannya twara liyu – Bantas bani ngutang raga – Rasan akune kedasang – Ento sutsut – Sinah manggih kajaitran

16. Ne jani jalan satwayang – Sang manyeda Weda Smerti – Tur tan ngugu Swarga Nraka – Ring Hyang Widhi minekadi – Sang Nastika kawastanin – Ne wahya wantah kadulu – Sukan kabyudayan bobab – Sukane mapwara sedih – Suka palsu – Ne tan mari ngawe lara

17. Suka tan pawali duhka – Ento rurung apang pasti – Kanisreyan adannya – Twara liyu ngalih kanti – Saranannya masih kincit – Ron busung masih tan perlu – Apa buwin ngamademang – Sinah twara kemarginin – Nging ne perlu – Wantah nyungsung suklan manah

18. Suklan manah kanggen panah – Matitis ngalih ne suci – Ne simpen jroning padma – Padmane munggah ring hati – Sarin tatwa dahat luwih – Ento bitbit apang pangguh – Anggon ngemit Sang Hyang Atma – Nging yan sok indria ulurin – Sinah lacur – Ane alih twara bakat

19. Kadropone becik tinggalang – Mangden tan iwang pemargi – Yan obah sinah tan bakat – Sarinnya bisa tan keni – Reh genahnya banget ninggil – Bisa ulung yan tan tuntun – Antuk gemeting jnana – Pilpil ento jroning hati – Mangden nerus – Manuncap sarining Yoga

20. Ne madan sarining Yoga – Wantah samadhine luwih – Pemargan Sang Yogiswara – Panunggalan rasa jati – Jiwane sampun manunggil – Ring Hyang Suksma sampun kumpul – Aworing Acinthyapada – Adoh saking lara pati – Puput landuh – Tan malih kacakrabhawa

21. Jantos iriki puputang – Dumadak semeton sami – Ledang ugi ngaksamayang – Satwa kincit tan pabukti – Sok rahayu ne keapti – Nyama braya mangden adung – Jagate kerta raharja – Adil makmur trepti sami – Swastyastu – Dirghayusa paripurna