Geguritan Diah Anggreani

Sane mangkin malih ngicen transkrip geguritan Diah Anggreani sane pipil saking kaset taler geguritan karembayang olih I Ketut Tirta lan Ni Wayan Nili. Yaning meled mirengan audio mp3, rarisang download ring link puniki geguritan bali.mp3

GEGURITAN

NI DIAH ANGGRENI

PUPUH SINOM

1.             Mogi asung sasuhunan, mapaica manyuwecanin, tityang jatma ikatunan, tuna sastra tuna budi, muda punggung mapi weruh, manegesin daging tatwa, kruna basa tanpa indik, kirang langkung, ledang ugi ngampurayang

2.             Manah lulut mengawinang, maring daging sastra aji, pangkah pongah sarwi gita, mahabrata ne ka widi, kapunggel anggen gurit, Diah Anggreni  ne ka utus, ngaturang guru daksina, maring Ida maha resi, sane kasub, dang hyang drona ring astina.

3.             Mojar bambang Eka Lawya, Diah Anggreni  arin beli, pengeleburan manah lara, kadi pengantungan urip, sat tirta sanjiwani, pamurtine giri wadu, tan waneh beli ngatonang, bilih adi wus mabersih, sinah ngungkul, widya dari saking kendran

4.             Adi ayu mas jiwatma, tampekin beli malinggih, pisarat beline mirah, nunas tulung ring i manik, mogi sida manadingin, da ja dewa walang kayun, indik beli nunas ajah, maring ida maha resi, sampun puput, kapradnyanan mapanahan

5.             Swadharmaning i sang sisya, sesampune nampi bukti, patut medana punia, nyihnayang astiti bakti, maring ida maha resi, antuk ledang ida nuntun, mapaica kaweruhan, boya saking ida pamrih, nanging patut, sisya ngaturang daksina

PUPUH MASKUMAMBANG

1.             Raris matur Diah Anggreni nyunyur manis, beli sang suweca, panglukan ibuk manah, sang hyang semara nyalantara

2.             Lintang bagia manah tityang ngiring beli, bagus wicaksana, ping solas tityang numadi, tan waneh tityang memanjak

3.             Nanging ampura tityang tambet tuna budi, wantah mematutang, kadi arsan beli mangkin, ngaturang guru daksina

4.             Yaning patut malinggih beli ring puri, tityang dados duta, ne benjang tityang memargi, de ja beli sumangsaya

PUPUH GINADA

1.             Nimbal ucap raden bambang, suksma beli ring i adi, adi tuhu jati tresna, ngemanggehang satya kakung, amatra tan naen tulak, tuhu jati, adi istri mautama

2.             Sadurunge adi lunga, amatra piteket beli, oja adi tuna yatna, napi malih nyasar laku, nak luh kadi i dewa, sampun pasti, anak lanang akeh ngedotang.

3.             Tata basa apikang, rikala adi manangkil, ngandap kasor munyi melah, sila ayu darma sadu, patut anggen gagelaran, mogi molih, lampah adi sida karya

4.             Diah Anggreni  matur sembah, tityang wantah mamimg singgih, nanging antuk katunayan, mogi asung hyang sinuhun, mapaica panugrahan, sida ke apti, labda karya lampah tityang

5.             Sampun puput bebawosan, pidabdab ida sang kalih, sane benjang pacang lunga, mamendak ida dang guru, mengaturang guru daksina, cihna bakti, sang sisya puput melajah

6.             Wengine tan kocapang, kocap sampun semeng mangkin, Diah Anggreni  wus memarga, ngalinggihin joli murub, maukir masoca mirah, mengangobin, cahyane joline dumilah

7.             Bala yuda petang dasa, ne patpat mamikul peti, medaging raja berana, pacang katur ring dang guru, ne siyos malih senjata, tios malih, matikulan sarwa boga

PUPUH DURMA

1.             Gelisang lampah nyane kang di nota, ngeranjing ring wana giri, dahat madurgama, makeh panggih sata wana, gajah warah miwah paksi, pada lega, mamunyi saling sambungin

2.             Katang gama sang utusan mandeg lampah, tanpa sama begal prapti, sareng petang dasa, saregep saha senjata, pedang tumbak miwah keris, tur manyandak, munyi bangras mamungkilin

3.             Yaning iba dot maurip di lemah pada, serahang barange sami, iba salah lampah, tanpa wangsit mai mentas, ngentasin wawengkon kai, liwat pongah, tuara nawang tata krami

4.             Bala yuda dahat merang madingehang, sayaga atandang jerih, anggreni gelih mujar, eda iba manyengkala, kai liwat pedek tangkil, ampurayang, kasep kasi nyelang margi

5.             Gegesonan i begal masaur nimbal, buat iba ngidih pelih, kai suba lega, nanging petine serahang, sinah iba nu maurip, pade tungkas, eda andel pacang maurip

6.             Bala yuda gelis nimbal mengarepang, eda iba liu munyi, sigug nagih motah, kai tosening prawira, metoh pati mela gusti, diastu pejah, a tampak tuara makirig

PUPUH PANGKUR

1.             Durung puput bebawosan, tanpa sama i begal galak numbakin, segrahan pada mangelur, bala yuda tan kirigan, manguwales saling sempal saling tusuk, pada wira ring payudan, pada nganken dewek sakti

2.             Saking teguh ne i begal, bala yuda akeh padem miwah jerih, ne jerih pada melayu, Diah Anggreni  padidian, Diah Anggreni  jerat-jerit nunas tulung, saget panggih sang atapa, Diah Anggreni  nunas urip

3.             Sang atapa lajer ring yoga, diah anggreni manawegang ngemalihin, gelis lebar yasan ratu, i wadu nunas tulungan, nunas urip sakitakara ring i ratu, tityang pacang ngaturang, tan sandang sangsaya ati

4.             Sang atapa raris obah, tanpa ngucap ngambil panah tur memargi, mentang panah ngrejek musuh, begal, rampok paju limpang, nandang kangin ne ajerih pada melayu, Diah Anggreni  manubagia, sang tapa ketampikin

PUPUH GINADA

1.             Inggih ratu sang atapa, aksi tityang matur bakti, antuk ratu sampun ledang, nulungin tityang i wadu, suksma aturang tityang, ne ping kalih, ledang ratu ngampurayang

2.             Langia purun tityang ngobah, i ratu nangun semadi, mogi tan kenin pinulah, wireh saking manah ibuk, boya saking manah pongah, mengaremit, anak lanang nangun tapa.

3.             Sang tapa masawur nimbal, bawos ida nyunyur manis, manyelis sang hyang samara, uduh dewa istri ayu, tan sandang ento ne panjangan, gelah menampi, buat dewa nunas iwang

4.             Lantur gelah menakenang, parab dewa sang aluwih, wiwit miwah kabuatang, antuk tambene mapangguh, nawi utusan dewata, widya dari, nyadia nyemaranin tityang

5.             Sang ayu asawur sembah, parab tityang Diah Anggreni , wiwitan jagat misada, lampah tityang wit kautus, ngaturang guru daksina, ring sang resi, dang hyang drona ring astina.

6.             Eka Lawya somah tityang, kocap sampun nampi bukti, kapradnyanan mapanahan, saking ida maha guru, antuk ledang mapaica, sane mangkin, tityang manguwales tresna

7.             I ratu sampun suweca, mapitulung kadi mangkin, mademang rampok lan begal, arta brana mangkin katur, ring i ratu sang piolas, durus tampi, mangda natan miratdana

8.             Suka ratu ngampurayang, basan tityang tuna luwih, kalih pituwus amatra, sinah tan manut ring kayun, satsat anggen nebus dosa, antuk sisip, purun ngoda sang matapa

PUPUH GINANTI

1.             Sang tapa masaur halus, dewa jati wadu luwih, gelah banget nyuksmayang, nanging punia sane luwih, boya emas arta brana, nanging manut sang menampi

2.             Kadi macan ne puniku, sinah lega wehin kancil, i lelipi sinah lega, yaning katak ya ne wehin, i kambing ya ngelen ulad, yaning paksa wehin pipis

3.             Kadi tityang lanang bagus, tengah alase adiri, kasusupan sang hyang samara, kalud indria ne mamurti, sungkan rahat jroning manah, napi anggen menambanin

4.             Sang ayu engsek ring kayun, matetegar mapekeling, inggih ratu sang atapa, i ratu maraga suci, kadi surya nyalantara, manyuryanin jagate sami

5.             Tapa bratan i sang wiku, manut daging sastra aji, semara dudu tan wenang, majajudan sios malih, momo, mobab tan kalugra, sida mangguh wiku jati

PUPUH MASKUMAMBANG

1.             Yaning ratu manungkasin linggih aji, werug ikang jagat, kala kala ne mamurti, panjak wadwa kasengsaran

2.             Ampura ratu atur tityang ngalintangin, nasikin segara, becik ratu mikayunin, mogi jagate raharja

3.             I sang tapa menyawurin sada aris, beli mematutang, manut kadi linggih aji, nanging kirang tuna nika

4.             Duk mayoga jati beli tapa luwih, ngagem satya brata, duk mademang musuh adi, sang partha beli jatinya.

5.             Kala adi nunas urip maring beli, adi masubaya, yaning sida menagingin, maupah sekarepnya

6.             Nak tan becik yaning lempas maring janji, lempas kocap sastra, yastu ujar tanpa aksi, niskalane ne mirengan

PUPUH SEMARANDANA

1.             Sang ayu kobet nyawurin, rumasa ragane iwang, ima kirang nguna dika, kalajok nunas tulungan, kadong caluh nunden anak, maupah sekita kayun, pelih bedik ngaselekang

2.             Inggih ibu dewi peri, muah beli Eka Lawya, ring dija ibu magenah, cingak tityang kasengsaran, kaselekang, olih sang partha, sisipan raos a buku, nenten sida negelidang awak

3.             Inggih ratu kesatria luwih, i ratu putran pandawa, tosning ratu mahotama, i ratu ngayomin jagat, genah wadwa masayuban, rikala tekain musuh, tan mrih sukaning awak

4.             Malih tityang mapekeling, nak luh lian ratu buatang, wadu jalir nenten kirang, sane seneng ngadol raga, oja ngalih sang mangkepan, mangda nenten ngawi letuh, tityang ngagem satya brata

PUPUH SINOM

1.             Ngucap malih sang arjuna, bes liu adi mamunyi, mapi weruh kocap sastra, anggon nekep bikas weci, beli jani mangumpami, pinakayang beli buruh, i dewa manggeh juragan, i juragan lan i kuli, pada adung, ngawetuang panemaya

2.             I kuli muputang karya, i juragan ngelong janji, solahe nitya wacana, tan manut kocaping aji, i kuli menagih janji, reh sanget merasa tuyuh, yan adi mamirat upah, i kuli maksa menagih, yan sing payu, boya madan sang arjuna

3.             Melahang dewa minehang, raga eluh tanpa kanti, tengah alas madurgama, nyen pacang manulungin, dyastu adi jerat jerit, i bojog tan senem nulung, becik adi ne menyerah, bareng beli nemu karmi, adi ayu, eda adi nampik bagia

4.             Liu bajang ne ngedotang, bilih ada masesangi, meled nawang sang arjuna, sane kasub mengagungin, uling malu kayang jani, mirib adi tuara ngugu, wireh tonden ngerasayang, yaning suba nawang bukti, nenten surud, adi pacang ketagihan

5.             Sang ayu kahemengan, lek jengah jeroning hati, satya laki kepagehang, dyastu mangemasin mati, sang Arjuna menampekin, sang ayu raris melayu, buat ngelidang raga, sang Arjuna ngetut kuri, saget sampun, memapag tepining jurang.

6.             Yan ratu pacang memaksa, tan wurungan tityang mati, matu manyaburang raga, sang arjuna ngasih-asih, duh adi jiwatman beli, antosang beli sang ayu, nguda adi nelascarya, sang ayu pageh ring hati, kasep nyaup, sang ayu nyeburang raga

7.             Sang partha kangen ring manah, rumasa ring raga sisip, ngulurin kitan indria, sengkala ne ka panggihin, tapane tan mapikolih, Diah Anggreni  puput ulung, nyesel kuri tanpa guna, kudiang pacang ngumbah pelih, mangu – mangu, matulak mantuk ke astina

PUPUH GINADA

1.             Tan kocapang sang arjuna, kocap mangkin dewi peri, nyadpada dewi uma, ring siwa loka kawuwus, makesiab jroning manah, kadi ngipi, sabda ngawang kapirengan

2.             Ke awas jeroning kita, katon Ida Diah Anggreni, katiben panca baya, jerat jerit nunas tulung, dewi peri kabingungan, nunas pamit, jumujug ke maya pada.

3.             Keawas saking ambara, Diah Anggreni  kepanggihin, rikala nyeburin jurang, gegesonan ida tumedun, lampahnyane kadi kilat, Diah Anggreni, kasaup tur kakeberang

4.             Saking tuduh sang hyang titah, Diah Anggreni  wangde mati, mangkin sampun kakeberang, dewi peri ne manulung, rauh ring jagat misada, tur mapanggih, Eka Lawya ring purian

5.             Raden bambang kablebegan, Diah Anggreni  ne prapti, kasarengin biang matua, kabilbil nyapen sang rauh, nguncarang pangayubagia, dewi peri, gelis ida mangandika

PUPUH PANGKUR

1.             Cening bagus Eka Lawya, liwat lagas i dewa ngutus wong pawestri, menangkilin maha guru, ngalintangin alas wayah, madurgama menek jurang tuun pangkung, rampok begal mekacakan, waduan cening tlah mati

2.             Diah Anggreni tambis pejah, manyeburin jurange dalem tan sipi, wit magehang satya kakung, satria jaruh ne mangoda, sang Arjuna tos pandawa sane kasub, wit Anggreni salah ucap, kadroponan nunas kanti.

3.             Yatnain dewa menanggap, manggih ala yan salah baan nindakin, darma patut anggen guru, mangda sida manggih bagia, tuna yatna sengkala pacang ka pangguh, wikan cening mawiweka, dasarin baan olas asih.

4.             Olas asih ne punika, senjata mahutama ne luih sakti, mamunahang kancan ripu, meseh sakti mawisesa, sinah lilih dulurin ban dharma sadu, nanging cening aksamayang, segara bakat tasikin

5.             I dewa sampun pawikan, uger-uger sang nata muatang indik, catur naya ne pang weruh, sama beda danda dana, keni sisip dyastu panjak miwah prabu, yaning sampun janten iwang, nanging sane manut sisip

6.             Sane sisip nunas iwang, i sang patut oja bangga ngangken ririh, bangras ngucap pati kacuh, patut saling menyampura, sang prabu yogya mapitutur ayu, antuk dharma kepatutan, mogi manggih tata trepti

7.             Suka dewa ngampurayang, ibu pamit mangda tan kasep menangkil, dewi peri sampun mabur, sang kalih nyakupang tangan, nyembah bakti ampurayang titiang ibu, antuk tambete kalintang, suka ibu ngampurayang

PUPUH DURMA

1.             Raden bambang menampekin i mas mirah, ampurayang ragan beli, tuna ngunadika, mangutus ragan i dewa, tanpa ngitung baya pati, de sangsaya, beli nyadia manindihin

2.             Sane benjang beli nyadia ke astina, ngaturang sang parta jalir, maring nara nata, i dewa patut sayaga, manggeh bukti lawan saksi, mamidarta, indik-indik ne sujati

3.             Duke malu inan lima ne tengawan, kabuatang maha resi, beli ngaturang, magehang guru susrusa, manah ening srada bhakti, ring bhagawan, dyastu urip mangemasin

4.             Eka Lawya dahat brangti ring sang parta, mabat ida jroning hati, ih iba sang partha, yening tuhu prawira, Eka Lawya tandingin, tanpa guna, manadi pacundang urip

PUPUH GINANTI

1.             Diah anggreni nimbal matur, duh beli mustikan hati, naweg titiang mapinunas, ampurayang pade sisip, sampunang ja beli lunga, sangsaya titiang ring hati

2.             Elingang piteket ibu, welas asih ne sungkemin, wikan beli mawiweka, ne cen patut miwah sisip, sampunang gelis kroda, yan kroda patute lisi

3.             Meled titiang mapawuwus, manah titiang dreda bhakti, kocap pacang nangun yadnya, karya agung ngeteg linggih, sampun nampek kerasayang, becikang beli makayunin

4.             Matetaki ring kayun, mangda yadnya lanus trepti, agung yasa agung goda, becik beli pageh hati, yasa kerti ne buatang, madak ica sang hyang widhi

5.             Yaning asung hyang sinuhun, asing alih sida kapanggih, dana punia mili membah, wireh kertin beli luwih, jagate kerta raharja, gemah ripah loh jinawi

6.             Yaning lampah tityang ilu, duk sang partha mengeramih, sampunang beli ne sangsaya, tityang pageh satya laki, tityang kantun mawak sukla, tan sandang beli moyanin

7.             Solah ida sampuniku, saking tityang salah munyi, antuk tuna pratiyaksa, sengguh tityang tapa luwih, mawinan lagas mengucap, saking sarat nunas kanti

8.             Janten beli mangkin weruh, jati titiang mawak sisip, suka beli ngampurayang, tanpa guna manindihin, becik mangkin ne urungan, arsan beli metoh pati

PUPUH SINOM

1.             Raden bambang nimbal ngucap, jati adi wadu ririh, yadnya anggen dedalihan, mapi weruh ling ning aji, manyilibang daya weci, mapi wagmi mapitutur, sida mangungkulin somah, mapi-mapi satya laki, mapi sadhu, nanging bukti mabinayan

2.             Minab adi ngepah tresna, tengah gua sareng kalih, sinah lega ngerasayang, kasusupan samara ratih, matemu di legan hati, nampanin satria jaruh, sangkan adi purun tulak, mangiringang beli tangkil, mirib takut, corah adi kasinahang

3.             Sang ayu gelis manimbal, jengah manah ne tan kadi, boya tityang tuna satya, boya titiang tuna bhakti, titiang bhakti sengguh weci, boya titiang saking purun, manungkasin anak lanang, nanging saking manah bakti, mapawungu, mangda tan manggih sengkala

4.             Yaning sampun saking sarat, ke astina ngadu sakti, titiang nyadia mangiringan, nyihnayang matindih bakti, iwang patut apang pasti, nangkilin ida sang perabu, maharaja yudhistira, reh ida meraga adil, jati tuhu, paragayan sang hyang dharma

5.             Raden bambang dahat lega, sang kalih raris memargi, sampun rauh ring astina, sang prabu sedek ketangkilin, bawu danda tanda matri, miwah arin maka catur, raden bambang saget prapta, mengaturang panganjali, inggih ratu, naweg titiang nunas lugra

6.             Parab titiang Eka Lawya, somah titiang diah anggreni, wit saking jagat nisada, saking sarat pedek tangkil, manguningang satria jalir, sang partha arin i ratu, marikosa somah titiang, maring tengah alas sripi, duk kautus, ngaturang guru daksina

PUPUH GINADA

1.             Sang prabu nuli ngandika, duh sang partha arin beli, manut ke luwir inucap, solah adi ne ne ilu, sang partha nuli, angucap, inggih beli, jati wantah sapunika.

2.             Sang prabu menggah piduka, meweh ida ngemanahin, meneng tan medal wacana, raden bima gelis matur, mecegik munyine bangras, ne te cai, nyurudang tosening utama.

3.             Yan si aku dadi partha, bagus genjing turin ririh, tuara pongah melegandang, bajange teka merebut, bilih ada mesaudan, bani mati, yaning tuara kasidayang

4.             Reh padidi ngawe dosa, cai nanggapin padidi, sang arjuna raris ngucap, inggih ratu sang perabu, beli adi sinamian, titiang sisip, lungsur titiang pengampura

5.             Naweg titiang nunas galah, majeng ring sri narapati, jaga muputang wicara, sang prabu tan mesaur, raden bambang ne ka batbat, ne te cai, pangkah ngendonang yuda

6.             Yaning tuhu perawira, jani lan atandang jurit, mula ngagen macentokan, Eka Lawya gelis matur, sampun ratu salit arsa, titiang tangkil, tan buat atandang yasa

7.             Titiang nunas kepatutan, ne manut kecaping aji, wit menawa darmasastra, pisarat pacang kalungsur, ledang ratu manugraha, titiang nampi, reh i ratu dewa sekala

8.             Sang prabu osek ring manah, kadi togog kelolohin, sepi sunia penangkilan, sang, partha gelis mesaur, ne te iba Eka Lawya, liyu munyi, tuara muputang karya

PUPUH DURMA

1.             Yaning iba tuhu tosening prawira, jalan ke jani metanding, ngadu kawisesan, tan wedi ngemasin pejah, timang ngawe kedek gumi, melah pejah, majumu kai numitis

2.             Raden bambang menyahurin sada dabdab, minab ratu salah tampi, ring pisarat titiang, titiang nunas keadilan, i ratu matandang jurit, titiang keman, yan pade nulak magutik

3.             Tan sama sang kalih sampun mayuda, saling lempag salih tigtig, sami pada wira, anggreni jejeh ring manah, inggih ratu hyang siniwi, sinampura, wit titiang yuda panggih

4.             Geni astra katiwakang sang arjuna, Eka Lawya sebet menangkis, gelis ngewalesang, antuk heru mahotama, sang partha kasep menangkis, puput seda, sang pandawa pada nangis

5.             Eka Lawya diah anggreni pamit budal, bima sena dahat brangti, macegik manyajag, nguyeng gada ngewalesang, sang prabu ngandika aris, tanpa guna, manindihin anak sisip

6.             Raden bhima nenten tulak ring sang nata, nakula sahadewa nangis, duh beli sang partha, liwat lasia beli pejah, tanpa, guna titiang urip, titiang nyadia, satya janji labuh geni

PUPUH SINOM

1.             Sang nata osek ring manah, yeh panone membah milis, uduh adi dananjaya, ampurayang tambet beli, tan sida beli melanin, manah beli tresna nulus, magehang treta semaya, tanpa guna kari urip, melah lampus, labuh geni sinarengan

2.             Dewi kunti kocap prapta, sarwi nangis ngasih-asih, uduh cening danajaya, lascarya dewa ningalin, minab ibu tanpa kerti, tan mari keweh ke pangguh, ring dija minab katunan, widhine minab tan asih, dados lantur, uripe mangguh sengsara

3.             Uduh nanak sri kresna, tulungin ja ibu mangkin, ibu nandang kasengsaran, sang pandawa labuh geni, i dewa luwihing kerti, tan mari masuweca nulus, sang hyang wisnu nyalantara, manggehang sukertan gumi, na tan surut, yan jagate tan raharja

4.             Durung puput masambatan, prabu kresna sampun prapti, dewi kunti lintang lega, raris manuturang indik, prabu kresna manyawurin, saindike titiang sampun weruh, tan sandang dartayang, titiang mangkin mangastiti, mogi asung, sang hyang widhi mapaica

5.             Manunggalan tri pramana, katibakan mantra sandhi, kembang wijaya kusuma, panugrahan sidhi mandhi, asung lugraha hyang widhi, miwah ida hyang sinuhun, kocap mangkin ida sang partha, katibakin mantra sidhi, raris bangun, sang partha eling ring raga

6.             Sang pandawa dahat bagia, miwah ida ibu kunti, sang arjuna sampun waras, medal baos kadi sedih, minab ida salah tampi, inggih ratu sang prabu, nirgawe solah sang nata, tanpa guna titiang urip, titiang lacur, dadi kakedekan jagat

7.             Sang prabu kresna ngandika, duh sang partha arin beli, tan sandang malih panjangan, mula titah sang hyang widhi, sang pandawa lawan beli, manumadi wit kautus, munahang momo angkara, mangda jagate sutrepti, teduh landuh, nyungkemin daging agama

PUPUH GINADA

1.             Yan pade idewa pejah, nyaman adi labuh geni, tos pandawa telah punah, dharma patute ya rubuh, momo angkara ne jaya, sinah pasti, kaulane kasengsaran

2.             Yan buat Eka Lawya, elah beli ban ngenehin, tan sandang adi sengsaya, sinah adi pacang ngungul, beli ne ngaenang upaya, ne ne jani, jalan luas ke nisada

3.             Sang arjuna matur sembah, titiang wantah ne sairing, sang kalih nuli memarga, tan asuwe saget rauh, ring genah jagat nisada, i sang kali raris ngawinan daya upaya

4.             Prabu kresna masusupan, ring arcane maha resi, sang partha nuli ngastawa, mamurti manados siu, rupa pateh tanpa ceda, diah anggreni, raden bambang kabingungan

5.             Inggih beli Eka Lawya, jejeh titiang ne tan sipi, reh meseheh mabinawa, raden bambang nuli muwus, tan sandang sumangsaya, becik mangkin, ring dang guru nunas ica

6.             Sang kalih sampun nyadpada, ring ida sang maha resi, naweg titiang nunas lugra, asung lugraha i ratu, antuk titiang kabingungan, menanggapin, meseh sakti kabinawa

7.             Ledang manah sang yadpada, antuk tembe kapiragi, arcane wikan ngandika, duh nanak sang darma nulus, idewa sisya mahutama, tuhu bakti, manutin darmaning sisya

8.             Kadi pinunas i dewa, sinah pacang kadagingin, wenten piteket amatra, rikala ngacep sinuhun, tan yogya ngamel senjata, napi malih, ali-ali kateguhan

9.             Soca bungkunge mekada, tan patut anggen mebakti, reh masoca kresna dana, dahat ngawe letuh agung, ngawe betarane duka, asing ke apti, boya pacang kalugraha

PUPUH PANGKUR

1.             Wawu mandeg pangandika, raden bambang mrasa ragane sisip, tungkas ring wejangan guru, bungkunge gelis katurang, ring dang guru reh kaucap ngawe letuh, mewali nyakupang tangan, nunas ica ngemalihin

2.             Singgih ratu manawegang, janten ratu suweca pacang manugrahin, antuk titiang tanpa letuh, bungkunge sampun katurang, gelis ratu picain titiang pawuwuh, mogi natan kabingungan, reh mesehe mangiderin

3.             Wanti-wanti nunas ica, i sang guru tan wenten malih nyawurin, metu sengsaya ring kayun, aksinyane kakedatang, jeg tengkejut bungkunge sane kahatur, natan wenten kekantenang, ngawinang jejeh tan sipi

4.             Diah Anggraeni matur sembah, yatna beli niki pangupaya ne singid, meseh beli sampun rauh, nangin wantah adirian, cingak beli sang arjuna ngangen bungkung, ne mesoca kresna dana, ngudiang beli pacang menagih

PUPUT